Zum Hauptinhalt springen

«Chill dä Läbä»

Uf emene Papiir si di drü Wörter gschtange, schreeg am Rand. Uf emene Papiir, wo im Zuug isch blibe lige. E Koleeg het se gfötelet u nächäär pär Meil verschickt mit em Komentaar «Chill dä Läbä – du hesch nur ihms».Di drü Wörter hei mer nümm us em Chopf wöuue. Afen emaau wiu si chuurz, bündig u sii win e Leitschpruuch. De tüe si es ganzes Schpraachuniversum uuf. Vorn es parne Jaar hätt me no gseit: Teik it iisi. U Grosätti ghöören i vor no mee Jaar säge: Was regsch di uuf, nimms wis chunt. Wo hüt «chill dä Läbä» dr Toon aagit, wärs vor no nid eso langer Zit «fuck life» gsii.Di chöi ja gaar nümm . . .We itz es paar vo Öich tänke, dää, wo daas gschribe heig, chönn ja gaar nümm Dütsch, oder en angere Satz im Chopf desume trööle mit di chöi ja hüt gaar nümm oder di wüsse hüt gaar nümm, de chan i nume säge: Woou, di chöi u di wüsse ganz genaau. U de wett i grad d Fraag aahänke: Wäär cha de hüt no u wäär weis de hüt no? Di Subermannen u ire Tross, wo mit irem Wiirtschafte mit Fantasiizaale, mit irem gruusige Guene nach geng mee u no mee Chlüder i eigete Sack die Krise hei usglööst, wo Tuusegi vo Miliaarde Franken u Zäätuusegi vo Aarbeitsplätz hei d Schisgass ab gschickt? U itz chöme juscht vo denen u phoute, di Booni, wo si mit üsem Gäut zale, zali si mit Rächt. Hei die jee nach iirgend emene Rächt gfragt? Hei die jee iirgend es angersch Rächt anerchennt weder daas, wos het müglech gmacht, das si im ene Lugi-sischteem eso viiu Gäut wi nume müglech i di eigete Seck chöi räche? Das verfiuzete Lugisischteem funkzioniert aber, nadäms het afa chroosen u rumoore, witer, wi we nüüt wär passiert. Dr Schtaat chouft mit üsem Gäut – es isch üse Schtutz, Amigos! – fuli Papiir u schteut keni Bedingige. Nada! Niente! Nüüt! Zu de Boonizalige gnappen üse Finanz-minischter u üsi Wiirtschaftsminischtere mit em Chopf wi früecher aube d Negerli uf de Sunndigsschueukässeli. Si säge nüüt, si bringe ds Muu nid abenang. Werum? Wiu die, wo si ne sötte d Chnöpf itue i de Banken u i dr Ufsichtsbehöörden iri Copäng sii us aute Zite. U was di Sach no miiser macht: Si si auui i däm gottvergässene Lugisischteem grooss woorde, won is Chuurzaarbeit macht, üsi Aarbeitsplätz frisst, üsi Chrankekasserücklaage, üsi AHV. Was meinet Dr?Meinet Dr, i regi mi mit däm groosse Mischthuuffe, wo zum Himu schtinkt u langsam i jede privaaten Egge ichemegget, no uuf über eso öppis wi «Chill dä Läbä» u fraagi mi, ob das guets oder schlächts Dütsch sig? Meinet Dr, i sig nid bi Trooscht u wüssi nid, wo di wüürkleche Probleem hocki? «Chill dä Läbä» isch für mii eso öppis win es Mantra woorde. Mängisch sägen is liisli vor mi häre, geng wider: «Chill dä Läbä» u derzue machen im Verschteckte ds V-Zeiche mit dr lingge Hang.U wäretdäm das i «chill dä Läbä» chüschele, suuffe si am WEF z Davoos Schämpis, frässe si Hummer, nadäm si d Reporter hei usegschteut, u schnure Blääch. U d Banke zale Booni u miir hocken uf de fule Wärtpapiir u gse, wi daas, wo mer müesam, ganz müesam hei uf d Site gchnüblet, das miggerige Batzeli, wo iirgendwoo uf emene Kontööli ligt, verrünelet. Win is daas, wo mer für ds Auter brüüchti, wiu mer nid hei chönnen i di eigete Seck moschten u Hüser chouffen u Sache chouffen u Lüt chouffen u ds Rächt chouffen u Regierige chouffe, verrünelet. Wis is d Ussicht uf e chli Sunnen u Weermi a dr Schattsite vo de Gwöönlechen u Chliinen im Läbe vernäblet u verbiiset.Isch «Chill dä Läbä» daa nid fasch «der Weisheit letzter Schluss». Wär daas nid wenigschtens im Aasatz fertig bringt, faat doch afa schpinne! U wär schpinnt, trääit düren u tänkt vilech a i weis nid waas. «Chill dä Läbä» macht kuul, macht ds Tänke müglech. Das mues nämmlech im ene totaau abghaufterete Sischteem, wo zämechrutet, vo unger choo, vo üüs. Obe louft nüt me. >

Dieser Artikel wurde automatisch aus unserem alten Redaktionssystem auf unsere neue Website importiert. Falls Sie auf Darstellungsfehler stossen, bitten wir um Verständnis und einen Hinweis: community-feedback@tamedia.ch