Furunkel D.T.

«Mundart»-Kolumnistin Renata Burckhardt und das Thema aller Themen.

hero image

S git im Momänt eis Thema, wo ds Thema vo aune mügleche Theme schynt z sy. Es Thema, wo me nid dra verby chunnt, wo eim jede Tag ufdrückt wird. Bym Erwache, bym Zmorge, im Tram, im Coop, bym Warte am Kiosk, bym Ychoufe, bym Schaffe, uf dr Strass. Vilecht sogar im Waud, muess i mau go luege. S isch Thema im Radio, im Färnseh, i de Zytige, uf Facebook. Chürzlech han i sogar müesse dra dänke, won i uf eme Buurehof es Huehn mit eme wysse Fädertätsch uf em Chopf ha gseh.

S isch es Thema, wo sech sogar by Hüehner ufdrängt. Das Thema isch eydütig es Problem. Scho nume deswäge, wöu me äbe nid dra verby chunnt. S isch wie mit Chopfweh oder mit eme Furunkel am Fudi. S git doch dä uraut Witz: S chunnt e Maa mit Frosch uf em Chopf zum Arzt. Fragt dr Arzt: «Was isch de hie passiert?» Antwortet dr Frosch: «S het mit eme chlyne Bybeli agfange.» So ischs mit däm Thema. Irgendwenn cha mes nümm verdränge, o we me wett. U de wirds zum ächte Problem. Ds Chopfweh wird fieser, ds Furunkel gruusiger, vilecht läbesbedrohlech. Und am Änd redt me lieber mit eme Frosch aus mit em Mönscht drunger.

«Das isch e böse Maa»

Entweder isch ds Problem auso würklech schlimm und abartig – oder me chunnt äben eifach nümm dra verby. Wöus en Eigedynamik entwicklet. Wöus sech breit u breiter macht, wucheret und sech am liebschte denn aune unger d Nase rybt, we grad aui säge: «Itz wei mr nid drvo rede, itz würklech nid, bitte nid.» Ja, s isch wie Geischter rüefe oder dr Tüüfel himself, einisch dr Name lut gseit u scho chunnt dr. U blast sech uf. Nimmt auem d Luft. Gruslig.

Nume Narzisssmus cha us nüt feiss u feisser wärde, derwyle rundume aues dünn u dünner wird. Bis nume no ds Echo blybt. So beschrybts scho die griechisch Mythologie. Narziss und Echo. S isch äuä lengschtens klar, vo wäm hie d Red isch. Sogar üse chly Pfüderi isch nach dr Wahl vom Chindergarte hei cho u het von ihm gredt: «Mama, kennsch du dr Donald Trump?» Ig: «Ja scho, auso nid würklech . . . werum fragsch?» Dr Chly: «Das isch e böse Maa.» Geschter ir Stadt het e Drogenabhängige über ne Kolleg, wo grad churz komplett usticket isch, gseit, disem syni Wuet syg itz äuä dr «Trump-Effekt».

Dr Name Donald Trump het zerscht nume irritiert. Was, Trump? Trumpf? Sumpf? E wunde Rumpf? E dumpfe Strumpf? Öppis zum Ärnschtnäh? E Comicfigur? Oder die Figur us em Chinderbuech «Kleiner König Kalle Wirsch»? Dr Kalle herrscht dert aus Chönig vo de Ärdmännli über füf Vöuker. Eis drvo isch das vo de Trumpe. Dr Zoppo Trump isch dr Aafüehrer vo de Trumpe. Är wott em Kalle der Thron wäg näh, mah aber nid richtig kämpfe. Drum versuecht dr Trump dr Kalle dra z hindere, dass dise dr Kampfplatz erreicht.

Drzue singt är mit syne Verbündete es Lied: «Wir bauen eine Falle / das wird das Beste sein, denn dieser kleine Kalle / fällt ganz bestimmt hinein.» Am Änd fingt der Kampf de trotzdäm statt. Und es gwinnt dr Kalle. Es Chinderbuech haut. Ir Realität aber schrumple aui angere Theme näb em Trump. Theme, wo vilecht wichtiger wäre. Baud ischs öppe no so wyt u d Vögu pfiffes vo de Decher. Oder äbe sogar im Waud: Donald Trump, Donald Trump. I gah itz mau go luege.

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt