Fasnacht für jede Tag

«Mundart»-Kolumnist Renée Maria Bellafante wirds langsam zu bunt.

hero image

Mys Gmotz über d Digitalisierig kennet der afe. O myner Zwyfu, wi viu dervo öppis nützt. Über ds zuenähmende Kontrolliertwärde all over hei itz de o baud aui gschribe, nume nützts vermuetlech nüt. D Faszination am technische Spile(le) isch z gross, u da bisch aus Kritiker/e nume ne Spassbräms. Ja Tuusigwätter, wär wett scho ne Spassbräms sy? Drum isch mer dä Artiku eismau ir Lokaupress grad rächt cho: «Mode für mehr Privatsphäre.» Inklusyve Biuder. Poah! Da wirds de farbig. Da isch Fasnacht nume no Bubizüüg dergäge. Da chasch de würklech säge, dass d Fasnacht wi di auti Fasnacht em Mainstream hingenachezöttelet, wenn das chunnt. Da chöi Punker u aui angere chly Farbigere eifach zämepacke.

Es geit itz auso drum, dass me sech, für der eewige Überwachig u Gsichtserkennig uszwyche, so richtig schrill schminkt u strääut. Ds Projekt heisst «CV Dazzle». Hochintressant. Natürlech sofort der Dix füregnoh. Dazzle heisst blenden, Glanz. Isch e Masterarbeit a der New Yorker Uni für Medie u Kunscht. How ever! Z ersch d Wäut versirache u när drüberschminke, oder so. Aber: Ärgere dich nicht, wundere dich nur; wi s aube ne aute Chef gseit het. Vilech het drum der nöi Presi ännet em Teich so ne steili Föhnfriise. Dä trout sym eigete Umfäud nid, oder vilech o nid sich säuber. U vilech isch o dä wöhler, wenn ne nid aui erchenne, wüu ne ja o nid aui liebe.

Item. Die Biuder, wo d Zytig bracht het, sy jedefaus aaregend u motivierend. Franse schyne ganz wichtig z sy. Die müesse d Nasewurzle verdecke. Am beschte zieht me ne Strähne bis über e Nasespitz, oder o no grad über ds Muu abb. Wurd haut es Bitzeli en Useforderig bim Ässe, aber das bruucht me de vilech eh nümm. Eifach jede Tag es farbigs Piueli mit Vitamine u Mineraaustoff dinne. Für Zwüschedüre e chlyne Snack vo nes Paar tröchnete Höigümperli, oder für d Hardcore-Veganer es Hämpfeli Alge. Da chasch der auso d Friise gäbig i ds Gsicht zieh. Natürlech immer schön uf d Variation achte. Me wett sech ja de no chly vo den angere abhebe u das wird de geng meh zur Useforderig. Hie no ne blaui Strähne, dert no nes violetts Zöpfli montiere u vilech no chly pink drüberspraye.

U im Gsicht no nes paar richtig schrilli Bemalige. Wär bis itz es mitleidigs Lächle het gha für Räschte vo Urbevöukerige irgendwo uf der Wäut, cha itz zämepacke u mues beschämt feschtsteue, dass die üs um Äone voruus sy u absolut nid hingedry. Mir si die, wo hingenacheschlärpele. Da öffne sech Fäuder zum Drübernachedänke, dass s tätscht! Da wird aues angers, definityv. Das zieht sech dür aues düre. Steu der vor, steisch am Morge vor em Spiegu. Kes Gnärv meh wäge bleich u Faute, oder «i kenne di nid, aber i wäsche di glych». Nei. Nume no d Frag: Aus was göh mir zwöi hüt? U när luschtvoue Griff i d Farbtöpf u zu auem, wo di macht z verschwinde. Kreiere dich selbst, isch ds Thema. O bi de Chleider.

Kes Problem meh vo: passt äch das zäme, oder geit äch das zu dere Glägeheit. Nei, eifach druflos. So schreeg u bunt, wis nume geit, u di irrschte Muschter aui dürenang. Ds Ziil isch, d Algorithme z verwirre! Du brichsch auso am Morge nid uuf, für go z schaffe. Du ziehsch i Chrieg gäge d Algos, u die schaffsch mit Links u ersch no mit Gnuss. Du erfingsch di jede Tag nöi. Dyner wysse Haar u d Ärger- u Sorgefaute über em Naseaasatz sy kes Thema meh. Du schminksch u frisiersch aues wägg.

Übrigens isch de o Demänz e kes Thema meh, wüu ja mit täglecher Verwandlig i irgend es Wunderwäse sowiso kene meh weiss, wär er isch. Guet, da wehrt sech de höchschtens d Chemie dergäge, aber das mues me i Chouf näh. D Persönlechkeit wird zum Unwichtigschte uf der Wäut. Mou, du, das het öppis. Mir bruuche kener Finde meh – mir hei ja d Algos. Da chasch de vo schöner, bunter Welt rede. Guet, vilech wirds mit em Verliebe chly schwirig, reschpektyve, das bedingt de o extremi Flexibilität. U je nachdäm haut ds Liecht lösche, wüu me nie weiss, was vürechunnt unger der Schminkischicht. Aber o das sy Peanuts. We s nume geng luschtig geit, het d Spassbräms gmeint, u tief i Farbchübu glängt. Aus was göht dir hüt?

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt