Mis Chundebedürfnis

«Mundart»-Kolumnist Gerhard Meister glaubt, dass die Kassen in der Migros bald verschwinden werden. Eventuell nach seinem Tod.

hero image

Ja früecher, da isch das no angersch gsi, da isch me ar Kasse ir Migros agschtange u het zugluegt, was dä vor eim ufs Band leit u het sech chönne Gedanke mache über sis Ichoufsverhaute u het chönne rückschliesse uf enes Läbe, wo zu däm Ichoufsverhaute ghört – aha öpper, wo ke Gäut het, aha en Aukoholiker –, oder de het me ganz eifach, bis me isch drane gsi, echli siner Gedanke chönne la schweife u vor sech häre troume. Das aus gits hüt nümm. I weiss gar nid, wenn i z letscht Mau ar Kasse bi agschtange, es isch ewig här.

Natürlech hets lang no beides gäh, Lüt, wo ar Kasse aschtöh, u Lüt, wo ihri Ichöif säuber tüe iscanne. Aber die ar Kasse si immer weniger worde u die ade Iscanmaschine immer meh. Jetz tüe sie de gli die letschti Kasse o no zue, hani dänkt, das lohnt sech ja nümm wäg dene paar wenige Lüt, wo hie no aschtöh. Zwar hets immer gheisse, me reagieri mit dene Scanmaschine ufenes Chundebedürfnis, u es wärdi säubschtverschtändlech witer Kassene mit ere Verchöiferin oder emene Verchöifer gäh, solang dass es für das o no Chundebedürfnis gäb.

Nei, hani dänkt, es Chundebedürfnis blibt so lang es Chundebedürfnis, wie me dermit cha Gäut verdiene, die ganzi Aktion mit dem säuber Iscanne isch e Schparmassnahm, hie geits um Profitmaximierig u fertig. Aber i hami tosche, d Kasse isch nid zuegange. O wo näbe mir nume no di auti Frou Hurni u dr Tarik, en Asylbewärber us Afghanischtan, aus einzigi Mönsche ir ganze Schtadt z Bedürfnis hei gha, ihri Ichöuf are Kasse ufs Band z lege u are Verchöiferin oder amene Verchöifer no ne schöne Tag zwünsche, o denn isch di Kasse nid zuegange.

När isch di auti Frou Hurni gschtorbe, u dr Tarik isch usgschafft worde, oder oder är isch untertoucht, uf jede Fau si beidi plötzlech verschwunde gsi, u nume ig bi no übrigblibe mit mim Bedürfnis nach Loufband u öpperem, wo für mi mini Ichöif iscannt u när ikassiert.

U natürlech frage mi mängisch scho, ob das normau isch, dass i mini Ichöif lieber ufenes Band lege u öppe no churz es Wort mit dem Ma oder dr Frou ar Kasse rede, schtatt wie aui angere vor di Maschine härezschtah u dr Ichouf Schtück für Schtück säuber izscanne.

Ja, i frage mi, öb mer da nid eifach mau echli ne Mupf sött gäh u mi ändlech o am Fortschritt aschliesse. Aber uf dr angere Site, dr luschtig Ton, wos bim Iscanne git, de ghöreni o, wenis nid säuber mache, u d Fröid am luschtige rote Lämpli, wo bi jedem Scanne uflüchtet, isch für mi jetz nid chliner, weni eifach zueluege, wies lüchtet, schtatt derzue no öppis desume zhantiere. Ja u d Verchöiferin isch mer o nid bös, dass ig ihre no immer Arbeit verursache.

Im Gägeteu, sie isch fründlech u schänkt mer ihres Lächle u kennt mi scho lang bim Name. U o dr Filiauleiter kennt mi Name u lächlet u wünscht mer e schöne Tag. I gibe zue, i rächne no immer dermit, dass er plötzlech uf mi zuechunnt, für mir d Vorteile vom säuber Iscanne z erkläre, u viellech sogar probiert, mir ids Gwüsse z rede, u mir d Chöschte vorrächnet, wo die Kasse u d Verchöiferin verursache, u dr Platz, wo die Kasse bruucht mit ihrem Loufband, u das aus nume wäge mir u mim Chundebedürfnis, wo ir hütige Zit eifach nümm tragbar sig.

U fantasiere, wie ner sech ufregt über mi u wie sech die ganzi Gschäftsleitig vor Migros ufregt über dä schtur Bock, wo eifach nid säuber wott scanne, u fantasiere witer, wie sie e Killer engagiere, für das Problem ändlech us dr Wäut schaffe.

Aber i Würklechkeit lat mi dr Filiauleiter i Rueh u lächlet, u d Migros nimmt witer Rücksicht uf mis Chundebedürfnis, o wes eigentlech scho längscht usgschtorbe isch u nach mir ändgüutig wird usgschtorbe si.

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt