Letschti Frage

Mundart-Kolumnist Gerhard Meister und seine Theorie zum unendlichen Universum.

hero image

D Wäut isch es chlises Chügeli, wo irgend e Chraft dürs Wäutau schpickt, so wirds verzöut, aber das schtimmt nid. Nei, d Wäut isch e Zunge imene grosse fischtere Mu, wo e Schpaut offen isch, so dass no chli Liecht iche chunnt.

Aber das Liecht wird weniger, Tag für Tag, gli isch es zue das Mu, u när schlückt irgend es ziemlech grosses Wäse, wo nüt weiss vo üs u mir nüt vo ihm, u mir gö aui z Loch ab.

Aber üsi Wäut wird nid verdout, für das isch si zchlin, si geit dürne Mage u blibt imene Darm are Zotte hange, u hanget dert es paar tuusig Jahr, u o i dere Zit gits Lüt, wo sech Gedanke drüber mache, wär sie si u wo.

Aber si chöme nid druf, wies würklech isch u rede no immer vo däm Chügeli, wo dürs Wäutau pfifft im Kreis umene Schtärn wo sinersits i Bewegig isch irgendwohäre. U üsi Wäut löst sech vo dere Zotte, u es geit witer zdürab dürne länge Verdouigstrakt, dä isch würklech läng u vergliche mitem Wäg, wo üsi Wäut da zrügg leit, si Millione vo Jahr ender churz.

Aber dass sech uf churz Furz riimt, das isch pure Zuefau, wo aber glich si Würkig het, mit riesigem Schub umene urwahnsinnige Knall wird üsi Wäut use blase.

Aber wohäre? Viellech isch das Wäse, wo mer nie öppis wärde wüsse drüber, en Aff mit länge Haar u a somne Haar, am üserschte Schpitz blibt üsi Wäut hange u wird hin u här gschüttlet, wiu dä Aff, wie bisse vo sech säuber, vo Ascht zu Ascht immer witer jagt.

Aber ke Angscht, es wird üs nid schturm derbi, was für dä Aff e Schritt isch, das isch für üs es Zitauter so läng wie das vo de Dinosaurier, vo de Eizäuer oder vo de Wirbulose, mir gschpüre nüt vo der Affehatz, aus blibt ruehig, u mir hei Zit, üs Gedanke zmache drüber, wär mer si u wo.

Aber die Idee vo däm Chügeli im lääre Nüt, sie isch ziemlech hartnäckig, me weiss nid rächt wieso, obwou, we me gnäuer häre luegt, so wird witer bhouptet, isch glich mängs angersch, aus me zersch chönnt meine. Das Chügeli sig zwar es Chügeli, aber wärd di ganzi Zit kopiert, u mir aui zäme o, sodass i unzählige Paralleluniverse unzählige vo denä Chügeli umeflügi, mit unzählige vo Hirni, wo sech unzähligi Vorschtellige machi drüber, wär mer si u wo.

Aber natürlich isch o das nid z Ändi vor Suechi, d Antwort uf die letschte Frage, die wird immer wieder nöi gä. Das, wo d Wüsseschaft üs hüt verzöu, so wirds gli heisse, das sig natürlech o nid ganz richtig u heig, gnau betrachtet, mit der Wahrheit gar nüt ztüe, eigentlech sig nämlech aus ganz angersch, u so geit das Schpili witer u chunnt vom Millionschte i Dimensione, wo niemer me begrifft.

Aber di ganzi Wüsseschaft cha ihres Schpili tribe, so wit wie sie wott, sie chunnt doch nie ids Mu u i Mage u ids Fäu vo däm Aff i sim Urwaud mit sine riesige Böim, wo übrigens, vo wit obe agluegt, wie nes grüens Meer usgseh, sanft gwöubt.

Aber am Abe, we d Sunne knapp über dene Böim schteit u über dr Sunne schwarzi Wouche dr Himmu verdunkle, de git das am Horizont e Schlitz us Liecht, wo das Grüen vo däm Boumteppich rötlech färbt, u es wird klar, das riesige Meer us Böim isch i Wahrheit e riesigi Zunge u dr Himmu d Rundig vomene riesige Mu, viellech vomene Schiudchrott, wär weiss, wo grad siner Eier het gleit a irgend emene Schtrand, möglech isch viu.

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt