Jedi Zyt het ihri Lüt

Geng ds glyche Rundeli. Aber so enorm früeh am Morge ischs äbe o wider nöi. Am Namittag die, wo die angere Hüng usfüehre. U z Nacht? Wär macht äch z Nacht es Chehrli?

hero image

S isch Summer u gäbig warm – u dermit isch ds Pfüsele haut chly gestörter weder süsch scho. Oder wird chürzer. Hätt nie dänkt, dass i i mym Läbe mau freiwillig so früeh würd ufstah! Aber itz isch fertig mit Schlaf, we d Vögu afö der Tag begrüesse. Ds Rotschwänzli wo umechäderlet. D Spatzehorde wo lärmet, d Chräie sowiso, u de bruuchts nume no d Tube, wo über em Fänschter abhocket u gu guu-gu macht. Wiso cha so ne schöne Vogu nid schöner singe? Mau i d Gsangstund zur Amsle! So trybts di us em Huus i der Hoffnig, no Chüehli z finge.

U wüu genau weisch, dass mit stygende Tämperature d Energie nid würklech meh wird, doch grad hurti es Morgemärschli. Dir wüssts ja afe: geng ds glyche Rundeli. Aber so enorm früeh am Morge ischs äbe o wider nöi. Wider ganz angeri Lüt. Ganz angeri Hüng. D Schwän u d Änte si no dranne, langsam z erwache u büschele ihri Fädere für e nöi Tag. Mit extrem Glück gsehsch e Biber. Mit extrem Glück gsehsch e Ysvogu. Isch das nid schön? S isch die Zyt, wo di Früeche ungerwägs sy.

Die, wo ähnlechi Näschtflüchter sy. Me versteit sech. U die, wo vor em Schaffe no nes Rundeli Bewegig ylege – bravo. Mängisch zieh si scho nes feins früsches Duftwüukli nach sech. Die, wo trotz em Speed no der Wiu hei, z grüesse oder z winke. Die, wo di vor luter uf d Bluetdruck-App luege, chly spät gseh u der i ds Gnick schnuufe wi ne Muni am Gatter. Nei churz: Es fägt u macht glücklech. Bruchsch ke Glücks-App, nume so nes Chehrli. U aschliessend schmöckt ds Zmorge u der Tag isch i Super-Startlöcher.

Wes speter wird, wüu weniger warm, gsehsch äbe de widerum die Lüt, wo zu dere Zyt göh. Die wo angers oder speter schaffe. D Änte u d Schwän sy scho startklar. Angeri Hüng si am Umeschnüfle. S isch itz nid so, dass i usflippe ab Hüng. Aber es git settegi, won i i ds Härz gschlosse ha. Wo mi aschmunzle mit e re Baue oder em ne Stäcke im Muu. So quasi: Chumm, spiu mit! Oder der anger, wo mer churzerhand uf d Füess hocket, wenn i mit sym Chef e Momänt ploudere. De gits der Lehrer, wo syner Schüler e Rundi lat la seckle u se mit em Velo geit go kontrolliere.

Di Junge si so ungerschidlech. Di einte gurkts totau a, angeri mache ds Chaub, no angeri lose Musig oder singe derzue. Teu grüesse. Teu nid. Teu blybe ganz zrügg u hei z weni Schnuuf. Teu wärde vilech mau Hochleischtigssportler, wüu si itz scho abgöh wi ne Rakete. S isch witzig. Jedi Zyt het ihri Lüt. D Störch uf der Antenne bim Sportplatz hei die Junge grosszoge. Vilech Digital-Cracks, wär weiss. Um d Mittagszyt de die Lüt, wo statt hei oder i d Beiz oder Cantine z gah, ihres Pic-Nic mit uf e nes Früschlufttürli näh. Oder dermit uf nes Bänkli sitze u dernäbe no grad d Änte fuetere.

Am Namittag die, wo die angere Hüng usfüehre u – vereinzelt – Eutere mit Ching. Geit mi ja null und gar nüt a, aber i finges schad, dass me mit Ching nid meh use geit. Vilech wäre de teu o chly weniger verhautensoriginell, we si sech meh würde bewege. Item. U gäge Aabe chöme d Bierchischte-Träger mit de Sound-Maschine. De wird gfüürlet u der eint oder anger wagt sech i d Aare. Mängisch gumpe nes paar ab der Brügg, wo langsam wider d Schlössli vo de Verliebte a Zahl zuenäh. Love 4 ever. E ja, mir hoffes doch. I fröie mi über das chlyne Räschteli vo Anarchie, wo da über dä Vernunftsentscheid vo wäge Korrosionsgfahr vom Brüggegländer der Sig dervotreit. S chunnt mer vor wi di munzige Pflänzli, wo aube dür Beton u Teer sech glych wider ihre Wäg bahne.

U z Nacht? Wär macht äch z Nacht es Chehrli? Vermuetlech fasch niemer. Aber sicher öppe mau e Fuchs oder e Marder, oder der Biber, wo no hurti mit em Gruebelämpli i ds Maisfäud tschirgget, paar Stängle ärntet u dermit uf der Rutschbahn wider id Aare verschwindet. Jedi Zyt het ihri Lüt. Aui Lüt hei ihri Zyt. Glücks-App obsolet. Mach es Chehrli, lueg i d Wuuke, montier es Schlössli! Bevor ds Navi seit: «Sie haben Ihr Ziel erreicht.»

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt