Irgendwo blybt öppis

«Mundart»-Kolumnist Renèe Maria Bellafante über coole Grosis und Postkartenromantik.

hero image

S git ja geng wider mau so Gschichte, wo öppis gfunge wird, wo Rätsu uslöst, Fröid macht u berüehrt. Poscht, wo ersch nach mängem Jahr aachunnt, oder Fläscheposcht, wo nöime aagspüut wird. So öppis Ähnlechs isch mer eis Mau o passiert. Ha im offene Büecherschrank gschnouset u nes Buech heignoh, u won i drinne blettere, gheie zwe Sache use. E Poschtcharte u nes Schwarzwyss-Foti.

Privati Poscht isch ja mängisch o pynlech, aber hie han i fasch gstrahlet, wi wes myni eigeti wär. Da mues e fröhlechi Rundi 1965 ds Solothurn Rösis Geburtstag gfyret ha. U das Rösi isch der Schrift nah äuä scho chly euter gsy. Öpper het es grosses Glas zeichnet, wo drü Mannsgöggeli drinne bade. Auso drü wyblechi Mannsgöggeli, si hei aui Röckli aa – gits eigentlech ds Wort Frouegöggeli o? Oder Frouegöggeline? Item. Eifach drü Persönli, wo da offebar grad bbadet, nid nume i ds Glas gluegt hei

En ufgsteuti Frouerundi, ersichtlech a de Kommentär u Ungerschrifte. Mangels Jasscharte hei si sech offesichtlech haut ender Spys u Trank zuegwändet u heis eifach cheibeluschtig gha. Übermüetig hei si o no ddichtet, so im Sinn vo «voll vom Wein und gutem Sein» u so. Derby hei si a ne Familie dänkt, wo denn z Lugano im Hotel Everest logiert het. U de isch die Charte dänk speeter vo Lugano wider nach Solothurn zrüggcho u im ne Buech aus Läsezeiche glandet.

Mach i aube o so, de dänkt me wider jede Tag a die, wo gschribe hei – so schön! D Charte säuber isch e Kunschtcharte, wo ds Handwärkerläbe vo früecher in e re Chlystadt zeigt. S isch äuä eifach e Charte, wo si grad zur Verfüegig gha hei i däm Momänt. Es 10er-Pro-Patria-Märggeli chläbt druffe. Ds Foti isch so schön, wi haut Schwarzwyss-Fotine sy, no so toll erhaute u nach au dene Jahr chuum verbliche.

***

Da sitzt en auti Frou im ne Chorbstueu im Garte. S isch vermuetlech afe chly früsch. Vilech Früehlig, vilech Herbscht, me gsehts zweni a de Pflanze. Es gstickts Chüssi im Rügge, e glismeti Wulletechi über de Chnöi. Näbe dra es Tischli, mit em Kafitassli, vor sech es Fuessschämeli. E Gehstock wird locker u sichtbar gwanet vo eire Hang gha. Di Frou luegt mit em ne heiter-nachdänklech-ruhige Blick dür ihri Brüue i d Kamera. Isch äch das ds Rösi? Das, wo si synerzyt sy Geburi gfyret hei u d Jasscharte vermisst u drum gäbig bbächeret? S mögt guet sy. Zuetroue würd mes däm coole Grosi. Me würd e re o zuetroue, dass si eim uf auergattig Läbesfrage chönnt Uskunft gä. E souveräni auti Frou.

Ds Foti u d Charte si geng no bi mir. I ha se nid chönne furtschiesse, si mache mer geng no Fröid. Ha de no chly im Telefonbuech gschnöigget, ob i vilech en Adrässat würd finge, ahand vo de Näme. Vilech hätt ja no öpper Fröid, we ner die Sache überchäm. Aber es isch mer nid glunge. 1965 isch haut o scho nes Wyli här. Vilech läbe si aui gar nümm. Vilech höckle si uf em ne Wüukli u jasse. I wünsche ne vo Härze, dass si dert oberfür en aaständige Wy hei.

Der Zuefau kreiirt luschtegi Gschichte. Me nimmt chly Teil a angerne Läbe, fröit sech mit, überleit, was denn gsy isch u was wichtig isch u was nid. Merci a ds Rösi u aui Beteiligte u a Büecherschrank mit sym Suchtpotenzial. E wunderbari Erfindig mit grossem Aadrang. E handglismeti Erfougsgschicht – u wi me gseht, o mit Überraschigsmüglechkeite u Stoff, für nöii Gschichte z schribe. U me gseht us däm auem use o, dass d Vergässlechkeit wunderschöni Blüete cha trybe, lang über d Zyt use, gäu Rösi.

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt