Zum Hauptinhalt springen

Gits dä no?

«Mundart»-Kolumnistin Renata Burckhardt lässt Tote mithilfe von Google wieder auferstehen.

Theme dränge sech mängisch uf, o we me se gar nid wott, sie chöme eifach u säge: «So, itz ig.» So wie o Figure in ere Gschicht, wo sech ungereinsch inequetsche u sech breit u breiter mache, obwou me sie gar nid het wöue. Im Läbe säuber ischs ja o nid angers. Ungereinisch chunnt öpper u seit: «So, itz ig.» E nöie Nachbar, e nöii Chefin, e Bekanntschaft, was o geng. Ömu hüfig zuefällig, dass ungereinsch öpper uf dr Biudflächi erschynt. Gits ne, dr frei Wille? I finge eigentlech ja. Mängisch aber dänken i churz: Nid geng . . . vilecht.

U so ha nid unbedingt i das Thema hie gewählt, sondern ds Thema mi. Wöu my Chly het geschter ungereinisch «wie viele Strasse muess e Bueb no ga, bis me sagt, er ist ein Maa» gsunge. I ha gseit, das syg vom Bob Dylan. Er het Nei gseit, das syg vom Cat Stevens – köschtlech, mit weler Überzügig Ching chöi Sache behoupte. I bi fasch vom Stuehl keit, won i dä Name ha ghört. Cat Stevens! I ha de verzeut, dr Cat Stevens syg scho lang gstorbe – u zwar han i das o in eire Säubschtverständlechkeit und Überzügig verzeut. Drufabe dr Chly: «Werum isch är gstorbe?» Ig: «A Droge.» Dr Chly: «Isch das scho lang här?» Ig: «Ja, das isch scho lang här.»

Mir isch zwar scho chly komisch z Muet gsi. U wo dr Chly de pfuuset het, bin i ga google. Ja, geng das Google. Wo eim sogar seit, wär no läbt u wär gstorben isch und werum. Uf jede Fau ischs eso: Dr Cat Stevens isch nid gstorbe. I ha däm eifach dr Tod zuegschobe. Woby me natürlech chönnt spitzfindig säge: Dr Cat Stevens gits tatsächlech nümm, wöu är nennt sech scho lang Yusuf Islam, isch 1977 zum Islam konvertiert. Komischerwys chan i mi nid erinnere, dass mir damals je öpper hätt erklärt, was dr Islam isch. Geschter Abe ischs by mir de no wyter gange mit em Google. Ja, einmal google, für immer google. Das isch so fatal.

Uf jede Fau bin i de irgendwie uf en Alain Delon gstosse. Ha auti Biuder von ihm gseh, syner wunderschön blauen Ouge u ha mi de gfragt, a was är eigentlech gstorben isch. Ja, Dihr chöits errate: Dr Alain Delon isch no nid gstorbe. Ihm han i dr Tod o grad eifach so zuegschobe. Ke Ahnig, was mit mir los isch gsi. Stars, won i scho lang nümm vo ne ghört oder mitbecho ha, sy für mi eifach tot? Nid grad charmant. U no so e narzisstischi Ystellig. Was i nid gseh, isch tot? Vilecht hets ja zwar e Berächtigung. E Star isch tot, we me nümm von ihm ghört – o we dr Möntsch no wyter läbt, oder? Dasch brutal, aber vilecht chly so. Drum sy d Monroe u dr Dean Ikone worde. Aber we me dr alt Delon aluegt, suecht me geng dr jung. We me dr alt Stevens aluegt, suecht me geng dr jung. Drum vilecht wott d Brigitte Bardot (ja, sie läbt no) kener Fotis meh vo sich. Nume bym Kirk Douglas (ja, är läbt no – über 100, syt 63 Jahr mit dr glyche Frou verhüratet, die läbt o no!) suechen i nid dr jung. Keh Ahnig werum. Dr aut Kirk isch eifach dr Kirk.

Dr glych kurlig Effekt han i übrigens o mit Ortschafte. Zum Bischpiu Bergün. Dert bin i syt de Achzgerjahr nümm gsi, itz aber chürzlech wider. S isch schön gsi. U glychzytig han i es säutsams Stuune i mir gha, dass es de Ort no git. Dass de die ganze Jahrzähnt wyter exischtiert het. Auso doch Narzissmus! Ähnlech ischs doch o, we me i de Ferie a d Wohnig deheime dänkt. Sech vorsteut, dass die ganze Möbu u Sache wuchenelang desume stöh, alleini u stiu, Chleider u Schueh, aues, während d Sunne uf- u ungergeit, wider und wider. Uf jede Fau exischtiert die Kolumne, we Dihr se grad läset. U nähr vilecht nümm. Oder äbe doch.

Dieser Artikel wurde automatisch aus unserem alten Redaktionssystem auf unsere neue Website importiert. Falls Sie auf Darstellungsfehler stossen, bitten wir um Verständnis und einen Hinweis: community-feedback@tamedia.ch