Fat mit T a und hört mit D uf

«Mundart»-Kolumnistin Renée Maria Bellafante hält nicht viel von Reizwörtern.

hero image

Theme für ne Kolumne z finge, isch mängisch cheibe schwär. Nid, dass es a Närvigem würd fähle, aber me möcht ja o no chly öppis Gfröits bringe, öppis, wo nid grad aui i nes Depressiönli gheie nach em Läse. Öppis, wo der Tag ufhäut u vilech es Schmunzle uf d Gsichter zouberet. Öppis, wo glych z dänke git u d Kritikfähigkeit förderet, ds Zämeghörigkeits- gfüeu stercht u nid deschtruktiv isch.

Aber gäuet: We me afe so nes paar Jährli gläbt het, chunnt me mängisch a ne Punkt, wo me dänkt: Bisch doch eifach e Trottu. Was machsch der Gedanke? Angeri stöh häre u si eifach guet. Si eifach gschyd. Si eifach schön. Muesch di gar nid so verusgabe. Nume chly Zytig läse u Ferni luege, de merksch: Bisch e Löu! Nimmsch ds Züg viu z ärnscht! Los mau zue, was Politiker i höchschte Charge für Wort bruuche. Äbe, itz chunnt mer grad i Sinn: Ha eigentlech e Kolumne über Reizwörter wöue mache. Item.

Auso. Was säge die so, im Interview vor ganz extrem wichtige Sitzige u Verhandlige? «Wir werden das ergebnisoffen diskutieren.» Du! Ergebnisoffen! Auso, was meinen ig de geng, was i Gschyds mües usela? Ergebnisoffen isch ds Zouberwort. Aues offe la, sich nid exponiere. Ke klari Stellig bezieh. Kener Wähler verlüre. Ja ke würklechi Verantwortig generiere. Ke Agriffsflechi biete. Nid ziilgrichtet, nei, ergebnisoffen. Es Wort, fasch so blöd wi «nachhautig».

S isch aues nachhautig. Du, isch eigentlech Autwärde ds Kreiere vor Nachhautigkeit? I wott so nachhautig wi müglech uf dere Wäut umesürmle, so mänge verruckt mache, wi s geit, so richtig Spure hingerla, vou dür aues dürechutte u trumple, dass es i extremschter Form nachhautig i de Hirni blibt hange, verbrönnti Ärde hingerla, aues umpflüege, ke Stei uf em angere la stah – oder so viu wi müglech la lache, bis ne d Büüch wehtüe u d Schminki vo de Lachträne verlouft. Aber gäu, das nützt o aues nüt. D Wäut träit eifach z schnäu. O d Nachhautigkeit isch – pfft – verpufft. Macht vilech o nüt. Aues «ergebnisoffen». Ergebnisoffen isch es Wort wi OOOOHHM. Tief schnuufe, i d Luft luege – unwichtig. D Wäut träit.

Aber i schweife ab. Was gits süsch no für Reizwörter? «Zeitnah». Nach a der Zyt – aber wo isch die? Wäm syni Zyt? Wiso nid eifach sofort? Oder exponiert me sech da scho wider z hert? Mir göh d Begriffe bezüglech Auter o so gruusig uf e Resärvenärv. Me isch ja nid aut. Me isch nume läbeserfahrener, Senior/in, Golden Ager. Aber das isch o scho düre. Itz wirds cool: Siuberfüchs sy mer itz. Warum nid no grad Siuberfischli? So die, wo geng i nes Eggeli verschlüffe, dass me se nid gseht. De scho lieber Siuberrügge. We dä los- leit, isch es de nümme ergebnisoffen. Dä schafft de Fakte. Da chasch itz wider ändlos philosophiere drüber. Was chönnt es nachhautig bruchbars Wort für ds Autwärde sy? U merksch ab auem Studiere no, dass Autwärde aues angere weder ergebnisoffen isch. Da chunnt de ganz klar eifach mau e Punkt. Eis Wort. Drei Buechstabe.

Fat mit T a und hört mit D uf. Derzwüsche isch es Rundumeli – ds Läbe. Isch das Horror? Regt das nachhautig zum Dänke a? Vermuetlech nid. Mir freese eifach wyter dür ds Läbe, schrybe u schnure blöd u ergebnisoffen u luege eifach, dass mers so guet wi müglech hei u chöi mache, oder nid? Grundsätzlech steut sech doch d Frag, ob Auter würklech es nöis Wort brucht. Di Junge wärde ömu o nid verruckt, wüu si jung sy u aus das bezeichnet wärde. Oder sueche die o chrampfhaft nach nöie Wörter, für d Jugend z verstecke?

Nei, chumm, i lyre im Züg ume. I sueche geng no nach däm Siuberstreife am Horizont, wo s de ändlech emau totau wurscht isch, ob aut oder jung, wyss oder farbig, Ma oder Frou – das wär de für mi es Ergäbnis vo Evolution u nid nume Kosmetik. Meine Damen und Herren: Wollen wir das zeitnah, ergebnisoffen und in der Hoffnung auf Nachhaltigkeit diskutieren? Lache blybt glych erloubt, gäuet.

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt