Zum Hauptinhalt springen

Dr Nachbar

«Mundart»-Kolumnist Gerhard Meister erzählt heute die Geschichte von seinem Nachbarn und wie er mit dessen Frau zusammenzog.

Natürlech hätti o ohni es Schpieguei mis Zmorge chönne näh, Brot u Gonfitüre hets ja no gha, Kafi o u das isch ja d Houptsach am Morge, dr Kafi. Nei, es wär würklech kes Problem gsi, uf das Schpieguei z verzichte, aber genauso weni es Problem isch es äbe o gsi, schnäu bi mim Nachbar ga zlütte u z frage, öb är es Ei heig für mi. U zuegäh, natürlich würd me im Normaufau, we dr Nachbar eim das Ei het gäh, fründlech merci säge u wieder i si Wohnig zrügg gah.

Nei, dass mir z Hushautspapier isch usgange, mit däm hätti mi Nachbar würklech nid müesse beläschtige. I ha ja schpäter sowieso no wöue ga ichoufe u hätt das Hushautspapier bis denn viellech gar nid bruucht.

Aber da hani mim Nachbar scho gseit gha, es sig mer dummerwis näb de Eier o no grad z Hushautspapier usgange. I meine, es Ei u echli Hushautspapier, das geit ja scho no, das isch jetz no nid unverschämt, u das mit em Rasierschuum u mit dr Rasierklinge isch mer haut eifach so usegrütscht. I wär äbe würklech sehr gern rasiert usem Hus u ids Coop gha ichoufe, das cha me ja irgendwie o nachevouzieh, u de hani haut grad drü Sache vo mim Nachbar übercho u hätt vo derthär nid no nach öppis viertem dörfe frage, das isch klar.

Aber es isch äbe o ne Tatsach, dass mi Chuchiuhr nümm isch gange, u ar Batterie ischs nid gläge, das hani scho usprobiert gha, di Uhr isch würklech kaputt gange, u es isch e schöni Uhr gsi, wo me jetz nid grad sofort wieder eini fingt, wo eim glich guet gfaut. U mi Nachbar het da voutschs Verschtändnis gha, är het mer sini Uhr sofort gäh, ja är het mer di Uhr, gäge Widerschtand, woni du plötzlech doch no ha ufbracht gäge so viu Hiufsbereitschaft, richtiggehend ufzwängt, u de ha se haut gno, samt em Ei, em Hushautspapier u em Rasierzüg, wo ner mer het e Sack gha derfür, dass i aus uf ds Mau cha übere nä i mini Wohnig.

U i däm Momänt isch mer dr Sässu ir Wohnschtube i Sinn cho, u wie unbequem dass er isch u eim würklech jedi Luscht verleidet, drin zhocke u öppis z läse, u ha mi Nachbar gfragt, öb er mer nid si Sässu heig, i mim chömm eifach würklech nid hocke. U är het gmeint, mou, sicher, u es sig doch am eifachschte, we mer dä Sässu ds zwöit i mini Wohnig übererträgi. U das hei mer när gmacht, u dr Nachbar isch scho wieder us mire Wohnig duse, wo ni plötzlech merke, wie nis fasch nümm ushaute ohni Frou.

Ja, u scho hane gfragt gha, öb är mir nid sini Frou chönnt gäh, i sig eifach wahnsinnig eleini sit mire Scheidig. U är wieder, mou sicher, aber das chönner natürlech nid über ire Chopf äwäg entscheide, aber er chönnere schnäu alütte u frage, was sie derzue meini. Sie sig grad am Ichoufe, u öb i ächt süsch o no grad öppis bruchi usem Coop. Aber mir isch nüt i Sinn, i ha mer ja aus, woni bruuche, scho vo mim Nachbar usgleit gah, wo jetz het gseit, sini Frou heig gseit, sie sig iverschtange.

Ja, u churz drufabe isch si hei cho u het ihri Ichöif grad bi mir ichegschteut, u da hani gmerkt, dass mini Wohning im Grund gno viu zchlin isch, für zwöit drin z wohne, u ha dr Nachbar gfragt, öbs ächt nid müglech wär, dass er mir u mire Frou sini Wohnig chönnt ghä. Für üs wärs äuä eifacher, mir chönnti i zwone Wohnig wohne, u är het gmeint, kes Problem, u leit siner Schueh a u si Mantu a, u wo ner si Schirm nimmt, frageni, öb är dä würklech wöu mitnäh, u är meint, es sig no Räge gmäudet, u i säge, auso eigentlech, weni ganz ehrlich sig, wäri froh, wenn er dä Schirm chönnti da la. U är seit, kes Problem, u schteut dr Schirm wieder zrügg u het sech scho verabschiedet, isch d Schtäge z dürab u usem Hus u us mim Läbe für immer verschwunde.

Dieser Artikel wurde automatisch aus unserem alten Redaktionssystem auf unsere neue Website importiert. Falls Sie auf Darstellungsfehler stossen, bitten wir um Verständnis und einen Hinweis: community-feedback@tamedia.ch