Dr Ärnscht vom Läbe

Mundart-Kolumnistin Renata Burckhardt über strenge Schulen, nervige Theaterkollegen und wichtigen Humor im Alltag.

hero image

Mi Bueb grännet mängisch, ds Läbe syg nume schaffe, schaffe, schaffe, früecher syg luschtiger gsi. Früecher heisst: bevor är i d Schuel isch cho. Leider chan ig ihm aube nid ganz gloubwürdig widerschpräche. Leider tüechts mi mängisch o, s gieb es paar Sache, wo nid bsungers luschtig sy. Wo nid bsungers viu Humor z finden isch. Drby: Humor darf geng, nid?

Zum Bischpiu Euterenabe. Aua. Ja, letscht Wuchen isch Euterenabe gsi. Syder stahn ig unger Schock. Aui, wo das scho kenne, dänke itz vilecht: «Gwöhn di dra, närv nid, s isch eifach eso.» Aber i cha mi nid dra gwahne. U byr Ussag, es syg eifach so, brönne mir sowieso d Sicherige düre. Chindisch, i weiss, cha nid angers. Euterenabe: S isch gsi, aus hätte die drei Lehrerinne gägesytig dr Eid abgleit, müglechscht humorlos überezcho. Mit em Ziu, d Eutere i dere Schtund la z vertröchne u zämelazkeie wie Sandburge. U sie heis gschafft. Bingo! Dusse vor em Fänschter isch e schöne Summerabe gsi, dinne Toteschtimmig. D Lehrerinne hei ihres Programm vorgschteut, aus giengs um ds Usfülle vor Schtüür­erchlärig. Nach füf Minute sy aui Eutere dert im Klassezimmer ghocket wie haub tot.

«I cha dr Tag chuum erwarte, we mi Bueb mit ere Rote Charte heichunnt. I rüefe de: ‹Guet gmacht.›»

I wott nid einzelni Persone schlächt mache. Mir sy ja aui im glyche Boot ghocket, u niemer het versuecht, Schtimmig dryzbringe. Auso Schtimmig im Sinn vo: Yeah, mir läbe no. Yeah, üsi Ching sy Gschpändli u dörfe i d Schuel. Und wär syt Dihr eso, Dihr angere Mamis u Papis? Wo isch ds Glas zum Aaschtosse? Klar sy Sitzige längwylig, aber de erscht rächt druff aaschtosse oder e chly Seich mache, nid? Oder wirds de schlimmer?

Aber Biudig, Schuel, ärnschthafts Schaffe isch bi üs verbunde mit dr Vorschtellig, dass es nid dörf luschtig sy. Humor würkt unseriös. Liechtigkeit würkt oberflächlech. Spass schpart men uf fürs Wuchenänd wie dr Rahm vom Dessert. Aber das isch doch e fundamentale Dänkfähler! I vergisse nie im Läbe, wo mir einisch e Theatermaa gseit het, i tüeg z weni lyde bym Schrybe. Erschtens hets nid gschtumme. Schrybe isch öppis Wunderschöns, aber natürlech machts o mi geng wider z lyde.

We mes nid uf e Punkt bringt, wie me wett, we eim d Schpraach wien e Fisch zwüsche de Finger wägflutscht, we me z viu oder z weni Tekscht het, we me viu z viu schaffet für z weni Gäud, we me nie ganz z frieden isch. Aber söu me us däm Lyde bym Schrybe e Show mache, oder was?! I tue nid gärn öffentlech lyde. S geit doch niemer öppis a. Zwöitens aber steckt hinger deren Ussag die verlogni grusigi Vorschtellig, öpper wo gärn lachet, tüeg nid ärnschthaft schaffe. Sorry, i muess es so derb säge, mängisch geits nid angers: son e Bullshit, son e Seich!

Zum Glück chan i säge: Mi Bueb geit gärn i d Schuel. Aber syni Ussag «früecher isch ds Läbe luschtiger gsi» macht klar: Die Lehrerinne, üses Schuelsyschtem heisst weni Schpass, weni Humor. We d Ching sech fautsch verhaute, bechöme sie zerscht e Gäubi u denn e Roti Charte. I cha dr Tag chuum erwarte, we mi Bueb mit ere Rote Charte heichunnt. I rüefe de: «Guet gmacht.» U de gang i schnuer­schtracks Richtig Schuelhuus, um e bitz go z rede. Aber mi Bueb wird ke Roti Charte heibringe. Är isch scho itz so brav wie syner Lehrerinne. Und i ha hie o nid grad viu Humor zeigt, pardon. Aber öppis wett i myre Primlehrerin, dr Frou Schenk, säge: S isch super gsi, unkonventionell, muetig, luschtig, lehrrych! Merci.

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt