Weniger isch meh – oder umgekehrt

«Mundart»-Kolumnistin Renée Maria Bellafante über Burkinis und Händeschütteln.

hero image

Spannendi Theme u Diskussione sys ja eigentlech scho. U nes chöme geng no nöii derzue, je nach Ufbouschigsgrad. Auso vor em ne Wyli das Foti von e re Frou im Burkini ir Zytig. U när d Artikle über ds Verweigere vom Handschlag. Jede macht sech da so syner Gedanke. Für mi ischs eifach so, dass, wenn i öpper vor mer ha, ig däm sys Gsicht u syner Ouge wott gseh, u vo derthär geit für mi o nid eifach aues.

Aber über das Ganze nachedänke, isch scho cheibe aaregend. Itz äbe dä Burkini. We me d Mode o nume so am Rand verfougt win ig, gseht me doch, dass o bi üs d Bademode wider es Bitzeli sittsamer isch weder o scho. Ja myni liebe Manne, so vor der Feriezyt steue sech da tiefgryffendi Frage u Problem. I jedefaus überchume di totali Kriise, wenn i ds erschte Mau i das Teil schlüüffe. Da häufe o kener Beschwichtigunge wi: E für dis Auter geits doch no, oder: Lue mau di angere a – nüt.

Kriise. Bodebös! O nes ganzes Badchleid löst das Problem nid. Nobis. U da han i itz äbe bim Ablick vo däm Foto mit der Burkini-Frou dänkt, wi eifach u schön das letschtlech wär. Der Chopf wett i auerdings dusse ha, da chäm de höchschtens es Hüetli i Frag, wüu mit öppis uf de Ohre chan i nid dänke. Isch so. Aber so ne schöne Stoff all over – mo mou du, das guub de ne schigge Strandspaziergang. Der Buuch chönnt me ja de glych no hinger irgendem ne Feus es Momäntli i d Sunne ha. U so viu Sunnecreme müesst me de o nid aatargge. Unfrei? Weiss nid. I ha itz säuber no nie ds Gfüeu gha, us em Décolleté quellendi Büüse oder unger de Hotpants vüreluegendi Füdlibacke syge der Usdruck vo Freiheit. Die faat gloub nöime angers a, meh so im Oberstübli.

Bsungers sexy han i settigs o no nie gfunge, weder bi junge, no bi eutere Semeschter. Abgseh dervo, liebi Manne, fingen i o bi öich nid aues hinryssend. So churzi Hose, Sandale u Socke, oder Ungerlybli für i d Stadt – das törnet de im Fau o abb. Nume dass das o mau gseit wär. Item.

När das vom Händedruck. Das hätt me vermuetlech o bilateral chönne löse, ohni di ganzi Wäut z involviere. I säuber finge ne Händedruck no schön, vorusgsetzt, es syg e Druck u nid e tote Fisch. Aber i weiss no guet, wis üs aus Goofe gstunke het, üsem Lehrer jede Tag müesse go d Hang z gäh. Me hets haut eifach gmacht, wüu me het müesse, u we mes hätt verweigeret, hätt me deheime o no grad e Händedruck übercho, aber en angere. Aues relatyv, aues Aasichtssach. Ach, Integration! I weiss nid, obs vo settigem abhanget u obs würklech dermit z tüe het. Gärn dänken i o a ne gschetzte aute Husarzt zrügg, wo mer mau verzeut het, wi ihm das aube gruuset u abglösche heig, we d Lütt z ersch ghueschtet u gchoderet heige – u ihm de d Hang ggä . . .

Me dänk o a d Grippe-Saison u wi viu Chäfer nid verteilt würde, we me vo dene Gepflogeheite chly würd abrücke. S het o für mi geng wider mau Lütt ggä, won i nächhär gärn bi go d Häng wäsche. U i hätt o scho bi nes paar Lütt gedige vermide, d Hang uszstrecke. Me sött eifach nid jede Muggefurz so ufbousche. O üses Verküsse isch ja mängisch krass u viufach o nid ehrlech u me cha nume hoffe, dass d Aazaau vo de Schmatzer nid no wyter gsteigeret wird. Verküsse u drücke sött me doch eigentlech nume die, wo me würklech gärn het u wo eim naach sy, aues angere isch e Farce. Di soziale Zwäng sy bi dere ganze Diskussion völlig unger ds Ys, u das fingen i schad. Aber es luegt haut niemer gärn häre, wes um die eigeti Verlogeheit geit. Mir persönlech gfaue eigentlech no die, wo sech mit zämegleite Häng meh oder weniger tief vor enang verneige. Das drückt für mi en Art vo Ehrerbietig us, won i schön finge u wo o jede verdient, mau so grundsätzlech. Meh isch de offe u wääubar, aber nid vorgschribe. Süsch chöme mer no so wyt, dass im Gsetz vorgschribe wird, wi mer üs z begrüesse hei. Viu liebi, diskret-virtuelli Grüess, teune o ne Schmatz u nes feschts Drückerli.

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt