Öppis übere Gschirrspüeler

«Mundart»-Kolumnist Gerhard Meister über technische Fortschritte und tödliche Bananenschalen.

hero image

I meine, warum nid öppis übere Gschirrspüeler? Immerhin schteit hüt fasch i jeder Chuchi so eine desume. Dr Gschirrspüeler isch e Teu vom Läbe, u ums Läbe geits doch i dr Literatur. U überhoupt, es git doch eigentlech nüt, wo me nid drüber cha schribe. Auso, wieso nid öppis übere Gschirrspüeler?

***

Es muess ja nid grad e Hymne si ufe suber Fortschritt, wo so ne Gschirr­spüeler bedüttet, wo vom Energieverbruch här bekanntlech besser isch aus vo Hang. Oder viellech äbe grad glich? E Verherrlichung vom technische Fortschritt im Geischt vo de Futurischte (natürlech, wie sechs ghört, mit ere ironische Brächig vo däm Pathos vo früecher).

***

Oder schriebeni besser es Gedicht über Gschirrspüeler? Immerhin riimt sech dä uf Hungerbüehler u Schmätterlingsfüeh­ler u im Norde isch es chüeler. U wer weiss, viellech chönnt grad so nes Gschirrspüeler-Gedicht d Lyrik irgendwo häre füehre, wo sie scho lang wieder einisch häre müesst oder viellech sogar no gar nie isch gsi. Guet, zersch muess mer das Gedicht natürlech no i Sinn cho. U de wächsleni de viellech glich no ufe Kochherd oder ufe Bachofe, wo me cha icheluege u gseh, wie öppis ufgeit oder schwarz wird, was irgendwie symbolisch isch, o weni jetz no grad nid weiss, für was.

***

I ne Gschirrspüeler gsesch nid iche, u dass das, wo me ghört vonem, tönt wie ne Bärgbach, das wett o niemer bhoupte. Im Gschirrspüeler isch ke ­Musig drin, ömu ke gwöhnlechi, u grad wäge däm het dr John Cage viellech mau es Konzärt für 22 Gschirrspüeler gschriebe. Mit sitelange, penible Vorgabe, was i dene Gschirrspüeler söu gschpüeut wärde u mit welem Programm. I gloubes sofort. I bi sicher nid dr erscht, wo öppis mit oder übere Gschirrspüeler macht. Guet, viellech gits no ke Krimi mit Gschirrspüeler oder ömu kene, wo öpper öpper angersch mit emene Gschirrspüeler umbringt. Wobis natürlech scho gieng, usem dritte Schtock zmitts ufe Gring würd uf hundert länge. Aber de muess dä Gschirrspüeler zersch as Fänschter u vorhär use us dr Chuchikombination, ei huere Büetz. U da schteut sech natürlech d Frag: Wie isch das motiviert? Wieso nimmt dr Mörder nid eifach e ­Pischtole oder es Mässer? Guet, er chönnt das Mässer natürlech mit dr Klinge gäg obe ids Bschteckchörbli tue. U we sis Opfer nid ufpasst bim Gschirrusrume, ratsch, isch di Bluetbahn am Handglänk scho offe. Aber schtirbt me de vo so öppis?

***

Wie wärs, we dr Mörder e Bananeschale e Meter vore Gschirrspüeler leit, wo när dr anger druf usrütscht u när grad gringsvora i das Bschteckchörbli mit däm Mässer zmitts driniche? Was aber wieder würd bedütte, dass dr Gschirrspüeler scho müessti offe si. Aber we dr Gschirrspüeler offe isch, de wird dr anger misstrouisch u luegt um sech ume u gseht när di Bananeschale, wo me sowieso ender gäge hinge use ufs Füdle usrütscht u nid gäge vore. Aber grad das Misstroue vom Opfer chönnt dr Mörder natürlech usnütze. Viellech het sis Opfer ja aus Ching mau mit ere Bananeschale oder mit emene offnige Gschirrspüeler oder wer weiss, sogar mit beidem öppis Schlimms erläbt. U de hätt natürlech dr Mörder i dere Chuchi das kombinierte Banane-Gschirr­spüeler-Trouma mit sire usgleite Bananeschale u sim Uftue vom Gschirrspüeler perfekt reinszeniert, u im Chopf vo sim Opfer wär scho nume vo däm Ablick dr Horror so wit id Höchi gschtige, dass dr Mörder nume no diskret vo hinge müessti hüeschtle, für dass dr Anger, packt vo schlimmschter Panik, gringsvora würd i das Bschteckchörbli u dadermit i das Messer iche gumpe. Nei, e Gschirr­spüeler-Krimi isch eigentlech bubieifach.

***

Da probierenis gschider mit Humor. Das git meh ztüe. Oder het scho mau öpper vo öich über si Gschirrspüeler glachet? So richtig kuglet vor lache, wiu dä Gschirrspüeler – ja was jetz? Natürlech, we öpper sis Schosshündli zum Trochne i d Mikrowäue tuet, de isch das o nid luschtig, aber immerhin usem Läbe griffe. Aber dr dräckig Hung im Gschirrspüeler, am Schluss überläbt dr das sogar no, u när isch Pointe futsch. Ja, e würklech guete Gschirrspüeler-Witz, das wär öppis. Oder grad e ganzi Serie, so wie über Manta-Fahrer oder Blondine oder Öschtricher. Oder zum Ufwärme viellech mau e Öschtricher-Witz, wo ne Gschirrspüeler drin vorchunnt?

***

Oder viellech, wiu me d Annächerig a sis literarische Sujet würklech nid sött überschtürze, aus erschts Mau e Mundartkolumne über e Gschirr­spüeler?

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt