Ds verwunschene Chnöi

«Mundart»-Kolumnistin Renée Maria Bellafante über künstliche Knie.

hero image

Eigentlech han i ja öppis angers im Sinn gha z mache – aber du seit eismau e liebi Bekannti bim Spitaubsuech: «Du, schryb doch mau öppis über künschtlechi Chnöi!» Ups, han i dänkt, das isch itz aber es zimlech schreegs Thema, wo weeni mit Märli z tüe het, aber warum o nid. Me cha us auem es Märli mache. Us Diktatur Demokratie, us em ne zerstörerische Depp e Wäut­star. Auso wiso nid...

***

Item. Im ne Spitau, won i mau gschaffet ha, han i dörfe nes künschtlechs Chnöi i d Hang näh. Het mi sehr beydruckt. Itz, nach es paar Aaretüürli u i d Wuuke luege bym ne Glas Hugo (me mues ja der Summer-Hit, wenn der Summer scho mau da isch, o no probiere), auso itz, nümm ganz Hugo, Fougendes: Es isch e mau e nümm ganz jungi Prinzässin gsy. U wis de so geit, we me nümm ganz jung isch: Irgendwo faats a hingerha, i ihrem Fau bim Chnöi. En äbefaus nümm ganz junge Prinz isch ere in ere schöne, schlossähnleche Klinik begägnet u het se, nachdäm si mängs Jahr gruusig Schmärze gha het, bechnöilet, das arme Chnöi haut i Gotts Name dür nes künschtlechs us Edumetau la z ersetze.

***

Si si handuseinig worde, u der Prinz het auso, nachdäm er d Prinzässin i ds Troumland gschickt het, mit Hammer u Meissu das Wärk voubracht. Sorgfäutig het er ds kabutte Chnöi entfernt u ds gedigene Edumetau platziert, aues schön grichtet, zemäntet, u de wider mit fyne Stiche zuegschnürpflet. Nächhär het er der Prinzässin Konsine ggä, wi si mit em Chnöisocke mües vorga u mit der Chnöi-Böigemaschine. Er isch vor ihre i d Chnöi u het ere gschwärmt, wi si de wider wi nes jungs Ding stägeliuuf u stägeliabb chönn. Scho gly chönn si wider söfu stah, dass si Chnöiblätze chönn bache. Das aues ohni Chnöischnapper u Chnöischlotteri. Si söui sech aber Zyt näh mit der Erholig u nüt über ds Chnöi bräche. O chnöile söu si vorlöifig nid unbedingt u vor öpperem i d Chnöi syg aus ryfferi Prinzässin einewäg nümm aagseit. Im Garte syge, wenn de scho, fürderhin Chnöischoner z empfäle. Si dörf wider tanze u die Chnöi so richtig entspannt o chly umeschlängge. Chnöihöchi Röckli syge haut chly düre, aber das mües är ihre ja nid säge.

***

«Rächt hesch», het d Prinzässin dänkt. «Chnöihöchi Röckli hei mer hinger üs, abchnöile vor öpperem müesse mer o nümm – aber ds Läbe vou gniesse, das geit alleweil no ordeli. Chly humple derby macht nüt. U we ab u zue so ne liecht ergraute Prinz vor eim chnöilet – wiso nid.»

Si isch auso z fride uf em Bettrand ghöcklet u het mit de Chnöi boumelet u zablet. S isch ere i Sinn cho, dass ir Schueu, wo si aube aus «Seniorin in der Schule» usghuufe het, d Ching ere «Zouberfrou» gseit hei. «Das mues doch verha. Ching gseh ds Züg mängisch genau richtig», het si sech gseit u Muet gfasset, für ds Läbe deheime wider aazgah. «Ere Zouberfrou cha ja eigentlech nid viu passiere, u we d Chnöi nümme wei, de nimen i der Bäse u freese dür d Luft, vor auem bi Voumond – auso alles klar. Itz chas chnöitief oder chnöihöch cho, ds Wasser bis zu de Chnöi stah, das lächlet e Zouberfrou eifach wägg.»

***

Di schigge Schüehli spickt si mit em ne gekonnte Chnöischwung uf d Syte u leit bequemi Turnschueh a. Derby geit ere churz ds Aschenputtel dür e Chopf, so vo wägem Prinz u de Schüehli. Si verabschidet sech gly druuf härzlech vom Prinz u danket ihm. Wünscht ihm, dass er guet wyterrytet uf sym wysse Ross u meint du no: «Wüsst Der, e Chnöifau vor der Medizin wett i itz glych, wenigschtens virtuell, mache. S isch ja scho toll, dass mer die Müglechkeite hei, u s nid nume nes Märli isch!»

***

I blybe, verzouberet ab dere Gschicht, z rügg u hoffe, dass mis eigete Seniore-Prinzässinne-Läbe ohni Hammer u Meissu vom Prinz wytergeit. U de fragen i mi, ob der Chnöi-Hämmerli-Reflex eigentlech bim ne Edumetau-Chnöi o no funktioniert? Antworte bitte unger einispinntimmer.ch. U geng schön i Bewegig blybe, gäuet.

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt