Die Musse – mues i, darf i, söu i?

«Mundart»-Kolumnistin Renée Maria Bellafante philosophiert über das Leben als Berner.

hero image

Musse isch es grosses Thema. S git scho einigi Büecher drüber. S wird haut aues i chürzischter Zyt e «Hype» – obs de öppis bewürkt, isch di angeri Frag. Musse isch es glungnigs Wort. Im bärndütsche Wörterbuech gits es nid. Vilech logisch. Bärner sy haut vo Natur us gärdet u cool, schön bodeständig u nid gsprängt. Di bruche kener Aleitige. Oder?

No schnäu ychoufe, no rasch putze, nu hurti wösche. No grad öpper ylade, no öppis choche, no gschwing der Rase mäije, no zu de Ching luege u chly mit ne spile, no schnäu a ne Geburi-Fyr, rasch es Gschänkli organisiere, tifig uf d Poscht mit der Glückwunschcharte zur Pensionierig. Zügig uuf für ga z Schaffe, effiziänt u flexibu aune Aforderige entspräche, fründlech, eloquänt uf jede Seich reagiere, locker-flockig blybe i aune Situatione, au haub Jahr es nöis Computer-Programm lehre, Nachrichte lose vo de Leischtige vo aune Idiote uf dere Wäut, zwüschdüre o vo den angere, informiert, aber immer schön cremig blybe, aues gäbig im Innere wägtische u wyterfahre mit em eigete Autag. Zwüschenyne no nes Autersheimbsüechli, vorhär no schnäu früschi Wösch u Socke ypacke u nes Blüemli go choufe. Gchlön u Bräschte ablose, immer schön Zueversicht verbreite u nes Witzli mache, no hurti es Käfeli näh, d Ching im Hort abhole, im Verbygang no ychoufe fürs Znacht, no grad d Schueh bim Schuehmacher abhole, geit grad im Glyche.

U so jede Tag u au Wuche, u s isch nume ne chlyne Teil vo auem, wo da ufzeut isch u wo de machsch, süsch würds z läng u z längwylig – u das dür ds ganze Läbe – u es geit ja geng aues u me schaffts ja o, u nume di Doofe bringes nid z stang u versuuffe u brönne uus – u für e Notfau gits ja no üsi liebi Chemie, dere mues me schliesslech o no unger d Arme gryffe, süsch chunnt die no i di rote Zahle. Ds Hamschterrad isch e Seich gäge das aues u dernäbe muesch ja no öppis für d Kultur tue, süsch chasch niene mitschnure u ds Agebot isch gross u d Ching müesse o no Sport u Musig u überhoupt, u we d das aues links lasch la lige, bisch suschpäkt. Ds Gschpängscht Müssiggang steit im Ruum! We när eine sozsäge i ds Auter chunnt, guet, das seit me ja nid, auso meh so i di nöii Läbesphase, i Seniorestand, i di guldige Sixty-plus oder so, git men ihm no der Rat, ömu ja nid naazla.

Immer schön der Wecker steue, Struktur isch aues im Läbe, au Tag öppis los ha, ja kener Us- u Abfäu. Vorwärtsmache, nume nid schlaff wärde, wyter umeseckle, Grossching hüete, yspringe, choche, Taxidienschte, Gedächtnistraining, Reise, Sprache lehre, dranneblybe. Muesch en Ufgab ha, darfsch d Häng nid i Schoss lege, nid us der Üebig cho, fit blybe, gseuschaftlech bytrage, uf d Gsundheit achte – hallo?! Für di när durend la azmache, choschtisch z viu? Nützisch di Junge us? Geits eigentlech no? U när bruchsch e Gebruchsaawysig, wi de söusch obenabe cho. Für lehre z chille u abzschaute? Das isch doch eigentlech nume schreg. S brucht e Revolution.

Mau afa u ds Wort Musse usenangnäh. Oder ömu afe mau der erscht Buechstabe uswächsle. Dusse. Ja, so viu wi müglech dusse sy. Sunne, Wätter, früschi Luft, düreschnufe. Fusse. Trockenen Fusses dür aues düre, wo me so mues. Gusse. Alles aus einem Gusse – eifach kompakt i eim Bitz blybe u sech nid la fecke. Tusse. E ja, warum o nid, ab u zue. U schlussändlech: Angeri Wort sueche für «Musse» – Längwyli? Uf ke Fau! Ender Multitasking: Höckle, mit de Bei boumele, d Zähie bewege, d Zytig läse, es Käfeli trinke u wär no ne Kick meh brucht, es Güezi oder es Reiheli Schoggi derzue. U sech gaanz schön Zyt näh derfür. Müssig? Nei, ein Muss.

Oder es Gedicht verfasse: «Möchte heute Pferde stehlen – dumm nur, wenn die Pferde fehlen. Also setz ich mich mal hin – wo ich bin». Oder so. Aber – excusez, gäuet, wartet schnäu, i mues itz hie abchlemme, s zieht nämlech grad e wunderschöni Wulche düre.

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt