No Teddy - no Talk!

«Mundart»-Kolumnistin Renée Maria Bellafante findet, dass Teddybären allmählich zu einem Luxusartikel werden.

hero image

Nei, du, das chöit der itz aber definityv nid mache. Nei, auso, trotz auem, wo me ja vilech no nes Milimü Bereitschaft hätt, sich uf d Moderni yzla – aber das geit itz gar nid: Schlagzyle – « Teddys digitale Konkurrenz» – u so nes Biudli vom ne blaue Plastic-Ding mit Ohre. Das isch itz würklech öppis, wo mi totau vom Socku hout u mer schier der Teppich unger de Füess wäggzieht – inakzeptabu, Horror!

Du, itz steu der emau es Läbe ohni Teddybäre vor. Da bisch scho vo Afang a, wo de ds erschte Schnüferli uf dere Wäut tuesch, derzue verurteilt, i re unwirtleche, düschtere, ussichtlose Wäut z läbe. Wi söu das gah, ohni so ne knuddelige, weiche, schnügelige, geduudige Mitlöifer, wo geng für di da isch. Wo abgwetzt wird über d Jahr, wo Ouge verlürt, wo d Näht muesch nacheschnurpfe, wo unhygienisch isch wi nume öppis – aber immer für di da. Das cha doch so nes Plastic-Teili uf ke Fau ersetze!? Scho nume gruusig zum Alänge. Chaut u unpersönlech. U vilech strahlets no. Da chasch so viu a der Form schaffe, wi de wosch. Ke Chance. Nie u nimmer ds Glyche. Ke Ersatz. Ke Emotion.

Du, da wachst e Generation ohni Teddyne häre. Das isch itz würklech worst case. Wenn i mer vorsteue, was für verzworggleti Seele das git. Da isch mer de der Roboter im Autersheim hundert Mau lieber, für d Fantere umezschüche u z pflege, weder es vo Grund uf teddybäreloses Wäse. Nei, dänket da no mau drüber nache. Das isch es NO GO!

Jedefaus nimen i mer vor, zuekünftig aui z frage, ob si aube no ne Teddy gha heige. Oder ob si geng no eine heige. Nach däm tuen i d Lüt de kategorisiere. Teddylosi wärde zum Findbiud – so! Guet, wenn i drüber nachedänke, was mi itz eigentlech so derart ergeuschteret a däm Ganze, wo ja no nid vouständig ytroffe isch: S isch ja nume afe ne Schlagzyle. E Tendänz. Spiuzügläde si haut vilech es Gschäft, wo verschwindet.

Spiuzügläde hei Müeh. D Lüt choufe im Internet. Immer Schnäppli, aues so biuig wi müglech. O Teddyne. Das merksch, we d mau so dür ne Abteilig geisch, wes äbe no eini het: Aues nume no so Minggis, glubschöigegi Plüschtier, made in Irgendwo.

Aber, mängisch de o widerum: di richtig schöne Teddyne i re Vitrine. Sogar bschlosse. Guet, das isch letschtlech rächt so. S isch a der Zyt, dass me merkt: E Teddy isch es Luxusgschöpf. E Teddy isch es Wunderwäse u brucht ds entsprächende Ambiente.

Vilech mues i das angers aluege u dä Trend vo der digitale Konkurränz füehrt zu re Ufwärtig vom würkleche Teddy. Vilech han i das scho aus chlyne Pfüpf gwüsst. Mys erschte Wort isch nämlech nid Mammi oder Pappi gsy, sondern Teddy. Guet, wi luschtig das für myner Antykeli gsy isch, weiss i nid. Vilech o chly ne Fruscht. Oh, es het sys erschte Wort gseit – ups! Vilech han i Schwein gha, dass me das so het la stah. Hüt müesst i äuä i ne Therapie. Abartig, es Ching wo aus erschts «Teddy» seit. Vilech säge zuekünftegi chlyni Pfüpfs «Tablet», oder «Galaxy» oder was o immer. Me weiss es nid.

Aber äbe, z dänke gits mer scho. Da sy Umwäuzige im Gang, wo kene weiss, wo si härefüere. Der Gedanke auerdings, vom Teddy aus Luxus-Guet, gfaut mer. Vilech chunnt me so wider uf e Gschmack. I finges no schön, we teu Sache öppis Spezieus sy. Das vergeit hüt e chly. Aues isch Massewar. O Parfum, Schmuck – aues. Het derfür u derwider, aber mängisch wirds ordinär. Eismau isch grad mys Parfum usgange. Di lääri Fläsche isch mindischtens 250 g schwär gsy, e chlobige Bitz Glas, wyt entfernt vo Flacon. Chönntisch öpper z Tod schla dermit. Grausam.

Item. Mir wei ja nid grüble. Wiso dass d Wyfläsche o geng schwerer wärde, müesst mer o mau öpper erkläre. Vilech, dass geng e Waffe im Huus hesch. Einisch e richtige Tunz a d Bire u der Ybrächer isch usgschaute. Oder damit im Auter wenigschtens bim Fläscheentsorge no chly Chrafttraining machsch? Schweife ab – aber machet, was Der chöit, gäge ds Teddystärbe – digital isch wi ne läri Fläsche – Flasche leere!

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt