In Krems, um Krems und um Krems herum

«Mundart»-Kolumnistin Renata Burckhardt weiss genau, wo Krems liegt.

hero image

I bi im Momänt z Krems. Luschtig an Krems isch, dass niemer weiss, wo Krems ligt. We me nid z Krems wohnt, geboren oder ufgewachsen isch, weiss me nid, wo Krems isch. So chunnts mir ömel vor. Aui frage: Krems, wo isch das? Un i han o ke Ahnig gha, bevor ig hie häre bi cho. Z Guete a Krems isch, dass es nid so viu z mache git. D Ablänkig isch nid so gross. Super fürs Schrybe. Drfür fliesst Donau verby. Das chönnt e Hiwys sy, wo Krems ligt. Aber d Donau isch fascht 3'000 Kilometer lang, dr zwöitgröscht u zwöitlengscht Fluss in Europa, u sie fliesst dür 10 Länder.

Das macht ken angere Fluss uf dr Ärde. Dütschland, Öschtrych, Slowakei, Ungarn, Kroatie, Serbie, Bulgarie, Rumänie, Moldau, Ukraine. Insgesamt meh aus 60 Stedt ligen an ihre, zum Bischpiu Ulm, Ingolstadt, Regensburg, Passau, Linz, Melk, Krems, Wien, Bratislava, Budapescht, Vukovar, Belgrad, Smederevo, Galati, Tulcea, Ismajil, Widin u so. Vier drvo Houptstedt.

***

Itz isch klar, wo Krems ligt. Nid wyt vo Wien. Z Niederöschtrych. Ir Kulturlandschaft Wachau, wo wyderum uf dr Lischte vo de Unesco-Wäutkultur- und -naturerbe schteit. D Gägend hie söu zu de schönschte Donaulandschafte ghöre. Und i bi hie für ne Monat Gascht im Literaturhuus. Vom Schrybtisch us han ig e diräkte Blick uf d Donau. S schaffet hie aus Gascht o no e Fotograf us Südafrika. E Musikerin us de USA. E Künschtler und en Illuschtratorin us Dütschland. Vis-à-vis vo üsne Atelier isch es Hochsicherheitsgfängnis. Dert hocket e Täter. Sy Namen isch wien e Fluech. Krems kennt me nid, aber dr Fritzl isch leider wäutberüehmt.

Wen i am Morge d Storen i mym Atelier ufekurble, ligt d Donau da wien es silbrigs Band, we me d Ouge zuedrückt, gseht sie us wien e Aluschtreife zmitts dür d Landschaft. Sie fliesst u fliesst, e ändlosi Mängi Wasser, wo eifach so verbyfliesst, egau, was passiert. I fackle us Versehe fascht ds Atelier ab – sie fliesst. I han en Unfall gmacht uf dr Pischte u ds Chrüzband vercheibet, cha fasch nid loufe — sie fliesst. Dr Sebaschtian Kurz, e lengeri Kataschtrophe vo dr ÖVP, isch dr nöi Bundespräsidänt vo Öschtrych – sie fliesst. Z Kitzbüehl föh uf dr Streif, dr krassischte Abfahrtsrennstrecki vor Wäut, ume d Rennen a, Durchschnittsgschwindigkeit offesichtlech rund 100 Kilometer pro Schtund – sie fliesst. Egau was isch — sie fliesst.

***

U nid nume sie. Sie aui, aui die Flüss u Schtröm. Kongo, Ganges, Amazonas, Mississippi, Mekong, Wolga, Nil. S het Fantastischs. Drum äuä vermissen i jede Summer mau d Aare. Drum liebeni Basu so, wäg em Rhy. D Limmat isch o ok, aber haut e Bitz schmal. Und itz d Donau. Ds berüehmtischte Lied über dä Schtrom kennt äuä jede, me chunnt nid drum ume: dr Walzer «An der schönen, blauen Donau» vom Johann Strauss. Ob d Donau blau isch, isch zwar fragwürdig. Ig hätts ömu bis itz no nie gseh. Blau isch sie vilecht erscht syt em Strauss. Hie und itz isch sie silbrig.

So viu us Krems. Obwou i nüt ha über Krems gschrybe. Tja. Panta Rhei isch haut schtercher. Überau u geng. «Wir steigen in denselben Fluss und doch nicht in denselben, wir sind es und wir sind es nicht.» Heraklit.

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt