Won i chürzlech e re langjährige Fründin wider einisch aglüte ha, seit si churzum: «Du, frag de bitte nid, ob i scho gimpft syg! Das närvt mittlerwyle öppe so, wi we me ewigs gfragt wird, ob me scho Grossching heig!» Stimmt. Gfragt han i de nid, aber ds Thema hei mer natürlech scho no chly behandlet. Auso das vom Impfe u ds ganze Drumum. U nach däm Telefon han i mer überleit, was das aube so isch mit dene Frage. Reschpektyve, wi mängisch dass me im Läbe Züg gfragt wird, wo me säuber nid weiss. Wo me nid weiss, wiso eim itz das öpper fragt. Ob das itz würklech öpper öppis ageit. Ob das wichtig isch.