Gnuusch im Fadechörbli

Auch «Mundart»-Kolumnist Renée Maria Bellafante leidet unter der trockenen Hitze.

hero image

Im Summer dünkts mi mängisch, d Hitz tröchni no der letscht Räschte Verstand uus. U mängisch fragen i mi, obs mit em Risle vom Chauch oder eifach süsch mit em ne Gnuusch im Oberstübli z tüe heig. Vilech wird eim o eifach je lenger, je meh bewusst, dass es kener definitive Wahrheite u Sicherheite git, kener klare Antworte, kener unverrückbare Sprüch – derfür jedi Mängi Widersprüch. We d so über ne Abschnitt vo Zyt wettisch drüberluege u di frage, was itz da dranne wichtig isch oder i d Gschicht chönnt ygah, chunnsch no grad mau i ds Schlöidere.

Guet. D WM. I ha ja meischtens nume ne müede Blick, we Schutte louft, aber wes mi de ynenimmt, de nimmts mi äbe de yne, u de stunen i ab mir säuber. Wi ni uf em Sofa umerangge, chlatsche u juble oder mitüri Ratschleg vo mer gibe, wär itz gschider wo sött stah oder wohäre seckle, für dass es ender es Gou gub. Merci schön! Besser, dass i mi nid vo usse gseh. Aber wenn i mer so überlege, was es aues brucht, für so nes Event z verastaute, uf aune Ebenine – de bringen i scho Bewunderig uf. Trotz aune politische Bedänke usw. U geng chly grinse mues i natürlech o ab der Wichtigkeit vo de Frisure bi dene Giele und em ganze Drum u Dra. Aber jede macht, was er cha u wi ne haut grad ds Güegi sticht. Mi närvts eifach gottlos, we me de die gstylete Heude zersch i Himu lüpft u fasch nid weiss, was für ne Chrone me ne no wett ufsetze – u we si verlüre, wird gschnödet u gchiflet u aues Wüeschte, u me lat se quasi la gheie wi heissi Härdöpfle.

U de no dä cheibe Doppuadler-Diskurs, wo fasch nümm het wöu höre. Du, i hätt das i myre Naivität gar nid gseh, we mers d Kommentatore nid uf ds Oug drückt hätte. U we si ds nächschte Spiu nach em Adler hätte gwunne, hätt o ke Geier meh dernah gchräit oder gchräzget. Aber so hei sech no ganz viu beruefe gfüehlt, no nes Kommentärli abzgäh (u das mach ig itz o no) oder fei e chly Wind z mache. I würd mer haut immer no sehnlechscht wünsche, dass mau aui Haub- und Ganzfrömde es paar Tage würde streike. Es wurd cheibe stiu. Ganz extrem stiu. S gub sozsäge e Uszyt i de meischte Beryche. U em eint oder angere wurd vilech süferli es Zwänzgi abegheie. Item. Jedefaus hei da auso diversi Spiu stattgfunge, wo sogar mi richtig spannend dünkt hei – u das wott öppis heisse. De sy üser Bundesrät uf d Schuelreis, u i hoffe, si heiges gnosse. Die – excusez – soublöde Kommentär i der Press bezüglech ihri Aalegine han i totau dernäbe gfunge. S isch haut o, wüu i nie i den ihrere Position wett sy (siehe oben betr. Chrönli u Härdöpfu). Da isch mer d Alegi sekundär.

Dernäbe bin i eifach immer wider froh, dass das äbe so nes Grüppeli isch, wo mues zäme rede u sech zämeroufe. U de machts mi no glücklech, dass mer nid so ne Gäubinaturwälle vor dranne hei mit dere komische Chrankheit, wo eim zwingt, unkontrollierte Blödsinn u Schlämperlige usezla. Mues de no mau nacheläse, wi dä Morbus heisst. Aber itz ischs grad z heiss. Jedefaus ischs sehr ungerhautsam z luege, wi sech bi so Usbrüch ds jewylige Umfäud bezüglech Gestik u Mimik veränderet. Aber höchschti Bewunderig für di grossmehrheitlechi Contenance! I würd die uf ke Fau härebringe u ender zu mym krassischte English-Wortschatz gryffe, u de müesst i das Rundeli gloub ohni z Ässe verla.

Aber vielch würd i o no chly blybe, für disi Gestik u Mimik z beobachte – aber när gängs i di nächschti Normaubeiz. U so nach em ne Glesli würd i mi uf ds Nöie frage, obs itz um Problemlösig oder äch doch nume um Säubschtdarstellig göng. Immer chly wirble, immer chly närve, sozsäge verhautensoriginell.

S isch Summer. D Hitz flirret u macht aues chly unscharf. Me weiss nid, wi wyt me sech uf Nachrichte söu yla, oder sech förchte, oder eifach lache, oder öppis trinke, oder Yswürfeli i ds Gnick oder der Chopf unger ds chaute Wasser...

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt