Zum Hauptinhalt springen

«Wüll halbi Büetz, das mache die scho itze»

Die Berner Schnitzelbänkler beschäftigen sich dieses Jahr eingehend mit Elektronik, Nahrungsaufnahme und etwas Aussenpolitik. Eine Zusammenstellung der närrischen Verse.

Der Bär ist befreit, die Bärner Fasnacht 2019 ist eröffnet.
Der Bär ist befreit, die Bärner Fasnacht 2019 ist eröffnet.
Nicole Philipp

Vegetarisch, glutefrei, ke Schwinigs, ke Laktose, fettarm, vitaminrich u ganz sicher nüt us Dose, saisonal, abwächsligsrich u low carb u vegan, e ganz normale Kita-Ässensplan(Die irren Maiden)

***

Bienli und Blümli hei mer alli düregno, öppis beschäftigt mi aber scho. Bi eire Spezies chum i nid drus, d Fortpflanzig vo Bure vo 3 Plus.(Hobelspän)

***

Zwe Gmeindrät für e glychlig Poste, Job Sharing, heissts, würd nid meeh choste. Mir finden aber, das würdi gar nüt nütze, wüll halbi Büetz, das mache die scho itze!(Gwundernase)

***

Dr Ueli Murer tuet keck verkünde! Ds Embargo gäge d Saudis chönn me nüm begründe! Si saudisch Fründ schrib ihm – (dä us de Finanze) – «sie chönnte wieder afa, guldigi Schoggitaler stanze». «Bring bitte no Schoggi – ds Metall hätt är binand – sie heige sit paar Wuche drum Khashoggi me im Land»!(Gas-Latärne)

***

«Dr Strom, won är het gspartsyt Jahre, verputzt är jtzbim E-Bike-Fahre.»

Laengobarde

Lieber Prämie und Buesse vor Schtüür abzieh, als Behinderti u Vätter, wo Ching erzieh. Die, wo das säge, si brav u bider, und im Herbscht, da wähle mir se wider.(Pfannehouer)

***

Mi Aut het mit sine dicke Stümpe geng die ganzi Wohnig parfümiert. Für d Gsundheit u für besseri Luft het är sone E-Zigarre probiert. Voletscht bim Rouke isch dä Hagu plötzlech explodiert. Sis Gsicht kennsch nümm, aber d Houptsach isch, sire Lunge isch nüüt passiert.(Wöschwyber)

***

Dr Housi, är spart Energie bim rasiere, trinkt ds Gaffee nid heiss, nume lau. Statt z heize loht är sech vom Schätzli massiere, u ds Liecht isym Chopf dimmt är grau. Är nimmt statt em Lift immer d Stäge, isch grüen, dass es tätscht, du myn Troscht, fahrt aber fasch füfzg Ka-äm-Ha ou im Räge mit E-Bike, das suuft ke Moscht. Dr Strom, won är het gspart syt Jahre, verputzt är jtz bim E-Bike-Fahre.(Laengobarde)

***

Chunnt mi Suhn, der Fuessballfan, letschthin bi mir verbi. Är müessi es nöis Libli ha, Manchester müess es si. Bueb, di Mode isch nid nöi, hani du zue n ihm gseit. Nur hei mirs dazumal als Hose treit(Die irren Maiden)

***

Düresteche, umeschlah, dürezieh und abelah, So isch jede einfach cho, zu sim Gratis-Mietvelo.(Hobelspän)

***

I muess es neus Navi für i ds Outo ha, so cha das nümme wyterga! Wüll, bi jedem Friedhof, wos mi grad preicht, chunnt d Mäldig: «Sie haben das Ziel erreicht.»(Gwundernase)

***

Süess oder Suur? Gspängschter stöh vor em Hus. So tönts bi Halloween – i mach mir gar nüt drus! «Näht dir Schoggi? Chinderriegel oder Brot?» Är äss das nid, sig vegan, meint eine u wird nid rot! Nahrigsmittelallergie het dise – chunnsch dr komisch vor – am Schluss gibe ig ne haut – äs Stückli Styrophor!(Gas-Latärne)

***

D Sozialhilf zahlt pro Tag e Schnägg, füf Schtutz für ds Ässe, dr Räscht fallt wägg. Dr Schnegg hett gseit, dass das scho gieng, viil besser giengs, wenn är scho gieng!(Pfannehouer)

***

Dr Trump verzeut viu Seich u tuet d Tatsache gärn verdräje. Dr Köppel maut dr Tüfu a d Wang, tuet überau Zwietracht säje. Dr Maudet lügt, git e chly zue, meint sech no drmit. U bhouptet fräch und unverfrore: «Abu Dhabi gits gar nit.»(Wöschwyber)

***

Im Bäregrabe, dert chlagt es Bärli, sy Rueh würd jtz nächschtens de gstört. Äs gloubi ou nümm a die rot-grüene Märli, wos gärn vor em pfuuse het ghört. S stopft Honig i syni Ohre, es brümmelet u schlaft schliesslich y, u troumet e Troum vo Elektromotore, wo ar Höhli verby-gfreeset sy. Eeeh löht ne doch d Fröid a dr Formel E. D Frou Wyss brucht eeeh keini Wähler meh.(Laengobarde)

Dieser Artikel wurde automatisch aus unserem alten Redaktionssystem auf unsere neue Website importiert. Falls Sie auf Darstellungsfehler stossen, bitten wir um Verständnis und einen Hinweis: community-feedback@tamedia.ch