Zum Hauptinhalt springen

S git di angere o

«Mundart»-Kolumnistin Renée Maria Bellafante findet, dass der Bahnhof für alle da ist.

S git di angere oHa gläse, dass d SBB u d Stedt d Bahnhöf u ds Umfäud vo de Bahnhöf attraktyver wei gestaute. Me stört sech a Gruppierige vo Aukoholiker u Umehockine, wo ds Biud negatyv beyflusse. Guet. Ehrlech gseit, mi närvts o, wenn i dert, won i grad chly wett verwyle u mer es Eggeli Glanzbiudli-Heili-Wäut i ds innere Aubum chläbe, so abgwrackti Gstaute gseh, wo das verhindere. Aber: Schönheit u Perfektion gits nume beschränkt u nid immer genau denn, we mir se wei. S git di angere o. Me wett die itz quasi nöime angers härelööke.

Ja, wo häre de? I d Arbeiter- u Usländer-Quartier? Dert, wo me süsch scho gnue Problem het? Eifach, damit si ds Oug vo de tröimende Perfektionischte nid störe? Damit der Blick u ds Näsli vor Schicki-Micki-Liga nid mit Bierfahne u Dräck, sondern nume mit Schämpis u Koks behelliget wird? Auso, excusez, gäuet, aber das würkt itz uf mi, u vilech nid nume uf mi – rychlech abgfahre. S dünkt mi geng, so nes Milimü über sech säuber nachedänke syg o no guet. Vo wo chumen i – u wo häre gahn i. Di meischte vo üs sy ja nid mit em ne guudige Löffeli im Muu gebore, sondern irgendwo, im wytischte Sinn, im Stau. I öppis ganz Gwöhnlechem, Eifachem, Füdlibürgerligem.

Di angere, wo nämlech würklech d Guudlöffeli-Liga sy, tüe meischtens nid so blöd. Müglechscht schnäu vergässe, wo si härchöme, das sy meh d «Möchtegärns». Di auermeischte vo üs läbe ja nume so guet, wüu di Vordere u Vorvordere gchrampfet hei derfür. Ob mers wei oder nid: Di Aktuelle sy immer die, wo vo dene, wo ne voraggange sy, profitiere. Das het ds Läbe so an sech. Das cha me o i d Diskussione beträffend AHV ybezieh.

Item. Was i möcht säge: Äbe, mi gruusets o, wenn i gwüssnegi Lüt aaluege, oder se mues schmöcke. Mängisch wächslen i o der Platz. I ha i mym Bruefsläbe gmeint, i heig aues gseh, aber i ha no lang nid aues gseh. Mängisch han i e Zytig oder es Heftli mitgnoh uf Husbsuech, damit i wenigschtens mit eire Füdlibacke uf em ne subere Plätzli ha chönne hocke. U mängisch bin i froh gsy, wenn i nach em ne Husbsuech wider früschi Luft gschmöckt ha u nid Urin- oder angeri Düftli.

Aber: S git di angere o. We me se vo Nöcherem aaluegt u ne mau richtig zuelost, cha me ganz viu verstah. Mängisch ghört me sogar Sätz, wo philosophisch so usgryft si, dass me se grad genau so chönnt drucke u mit irgend em ne tolle Name verseh, u si chäme gross use. Näbeby: Meischtens ruume si ihri Plätzli besser uf weder mänge Wooustandsverwahrloste. Was nid heisst, dass me Gwüssni nid gylchzytig am liebschte mau unger d Duschi würd steue u se chly schüttle u müpfe, für sech us däm Chaos usezbewege.

Aber wär entscheidet, was guet u nid guet isch? Wär steut die Regle uuf? Isch das perfektionistische Läbe, wo mir da geng meh druf zuestüre, würklech so toll? Isch es ersträbenswärt, sech e Kim-K.-Arsch la härezpouschtere? Mues me sech dä uf der Frontsyte vom Tagi-Magi la serviere? Ha o scho Lütt gseit, wo mi für Gäut gfragt hei: Lüpf mau ds Füdle u schaff öppis. Dänken i immer mau wider. Schynt mer o legitym.

Aber äbe: S git di angere o. Me isch o i üsne verwöhnte Breitegrade, we öppis i d Hose geit, ganz schnäu u trotz aune Versicherige abgstürzt. U vo je höcher obe, deschto brutaler. Da nütze o Tuusegi vo Follower nüt. Päng! Passiert.

I überchume haut eifach mängisch e Wuet. Mynetwäge totau emotional, aber das isch mer wurscht. Es git doch no ne öffentleche Ruum. Me söu nid immer aues reguliere. Das isch eifach nid läbesnach. Das heisst nid, dass me nid reklamiert, wenns gäch wird bezüglech Emissione – aber – me sött no chly Freiheit la. S isch nid aues privat u nume dene zueghörig, wo konsumiere. Ds Läbe isch eifach viusytig, nid nume schön agleit, technisch uf em höchschte Stand u gliftet u gschminkt. S isch vilech wi i der Fondue-Reklame: «Chly stinke mues es». S isch ganz banaau u s mues irgendwo o no nes Plätzli ha, zmitts drinn, eifach, wüus di angere o no git.

Dieser Artikel wurde automatisch aus unserem alten Redaktionssystem auf unsere neue Website importiert. Falls Sie auf Darstellungsfehler stossen, bitten wir um Verständnis und einen Hinweis: community-feedback@tamedia.ch