And the Oscar goes to: The Ghüdermanne!

«Mundart»-Kolumnistin Renée Maria Bellafante lobt die Kehrichtabfuhr in den höchsten Tönen. Was wäre ein Leben ohne sie?

hero image

Ja. Machet ändleche e rächte Ehre-Tag u Prys für die, wo d Wäut ufrume. Wo s wenigschtens probiere. Jede Tag nöi. Seit me eigentlech no Ghüdermanne? Putzfrou seit me ja o nümm – aber es sy glych geng no die, wo hinger den angere ufrume u putze. Ruumpflegere. Aber die pflegt ja ke Ruum, die putzt üse Dräck wägg, ganz schlicht. Chasch so schöni Wörter sueche, wi de wosch, s änderet nüt a de Facts. Aber klar isch: Aui die, wo sech mit üsem Ghüder beschäftige, ghöre mau ghörig gehrt. Mau Glanz und Gloria nume für si. Für die im Übergwändli u de dräckige Schueh. Kener Usschnitte bis zum Buchnabu abe u Stögi – Ghüderlüt.

I frage mi geng, was die so dänke u was die aues gseh uf ihrne Toure dür d Quartier. Mir längt scho das, won ig gseh, wenn i chly umetschirgge u drüberluege. I ha di fiisi Eigeschaft, d Lüt nach ihrem Ghüder z beurteile, u da faut natürlech mängs Urteil nid grad schmychuhaft us. Ganzi Chinderzimmer-Yrichtige, Büromöbu, Gartestüeu, Meersöilichefig usw. D Seck nid rächt zue, Bitze vo Brot, Züpfe u auergattig Ässware etc etc. När dänksch, dass me no äxtranegi Bärgtoure mues organisiere, für e Ghüder vo de Alpinischte u Bärgliebhaber (!) go z entsorge. Ganzi Insle vo Dräck u Plastic schwümme uf de Meer, teilwys i der Grössi vo Kontinänte. Sogar im Wäutall isch scho aues vou Ghüder.

Aber anstatt dass me da rot wird u sech i Grund u Bode schämt, brüschtet me sech dermit, dass me itz ganz innovativi Grät erfingt, für dä wider ufzsuge. Ja Herrschaft! Wiso leit me itz auso nid de ganz autägleche Ghüder-Spezialischte der gröscht rot Teppich häre, wos nume git?! Wiso isch wyt wägg geng wichtiger aus vor der Türe? Wiso gits e Ghüder-Mafia? Wo u für wär isch die Rändite? Wiso redt me ständig vo Plastic sammle u derwyle packt me o no der hingerletscht Minggis i Plastic y? Jedes chlyne Gmüesli u Salätli i Plastic. Cha me haut so schön bigele oder was o immer der Grund isch, aber i finges uffäuig. Das Plastic fingsch de i de Mäge vo de Meertier u churzum o im Körper vo Dyne Grosching – aber das intressiert o nid würklech.

D Wirtschaft boomt. Woustand für aui. Sicher – aber so? Ja, i schweife scho wider ab, u luschtig ischs o nid u überhoupt nid positiv u sexy. Aber Ghüder het das so a sech. Ghüder isch das, wo bi der Woustandsgseuschaft hinge usechunnt – u das het per se nüt a sech, wo me chönnt blöffe dermit. Output isch ja guet, aber settige luegt me lieber nid so genau a.

Wo nähme ömu o die Ghüderlüt ihre guet Luun här? Hei die no Hoffnig? I mues da mau nachefrage. Isch es, wüu si wenigschtens aktiv öppis mache? Wüus wenigschtens e Momänt chly schöner usgseht uf der Strass? Wüu si relativ sicheri Jobs hei? Ömu bi üs. We Ghüderlüt streike, gits i chürzischter Zyt eis Chaos. Kenne mer us em Fernseh. Widerlechi, stinkegi Hüüffe. Insekte u Ratte. De wird uf ds Mau klar, was Ghüder bedütet u wi schnäu di Bärge wachse. De gits o im noble Quartier es müffeligs Düftli.

Me steu sech voui Pampers, Räschte vo Fisch- u Meerfrüchte-Mauzyte u aute Chabis vor bi 35 Grad im Summer. Nei chumm! D Ghüdermanne u Froue verdiene ds guudige Ghüdermannli, aber es rächts, gross u 18 Karat. O die vor Grüenabfuehr. Dert isch der Kreislouf chly angers u i däm Sinn sympathischer. Aber Raseschnitt, wo 14 Tag im Plasticcontainer vor sech häregäret, isch o nid Chanel 5. Das aues mues usghaute wärde, u ds Gschmäckli geit nid so schnäu us em Näsli. Drum wär i o gäge Littering-Gäudstrafe, aber derfür, es paar Wuche im Hochsummer gratis mit de Ghüderlüt uf ds Tournee zgha. Da vergängte em einte oder angere die coole Sprüch.

Bi vilech wider am Schueumeischterle – aber vorlöifig, u bis uf zimlech Wyteres hei mer ja nume die Wäut. Frage cha me sech natürlech no, wiso Ghüder räntiert. Wiso s äbe ne Mafia git u da si o mir Zueliferer. Vilech ähnlech wi im Gsundheitswäse. Da redt me vo Spare, aber wenn es Spitau mues räntiere, chasch sicher sy, dass nid nume das operiert wird, wo zum Über- u Wyterläbe nötig isch. Item: Glanz und Gloria! I schrybe d Red, Patänt Ochsner chäm vilech cho musige, notfaus häben i d Red o, aber ender i T-Shirt u Turnschueh, gäuet.

Der Bund

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt