Ke Füdle

«Mundart»-Kolumnist Renée Maria Bellafante über die vielen Warum-Fragen, die auch mit dem Alter nicht weniger werden.

hero image

I darf di letschti Mundart-Kolumne vo däm Jahr schrybe, u da han i beschlosse, no mau chly uf e Putz z houe. Geit nid angers. Teu Sache nage eifach a mer u i wett ja nid i ds nöie Jahr mit den aute Problem – aber vermuetlech geit o das nid angers. Bim Rückschouhaute hets mi dünkt, i syg eigentlech nid viu wyter weder aus Ching: I ha immer no Hunderti vo Warum-Frage. U die wärde nid weniger mit em Auter, die wärde meh! Eigentlech brutaau, aber isch so. Item. Zu myne Warum, wo mer ke Rueh lö:

- Warum wirden i der Gedanke nid los, dass d Wirtschaft – u nid d Politik –regiert? - Warum reagiert d Politik nid subito, we der Markt (gits da eigentlech kes würklech bärndütsches Wort derfür? Guet, Märit – aber das preichts ja nid würklech) Züg uswirft, wo me vo Aafang aa gseht, dass es e Chabis isch. Reschpektyve me vo Aafang a würd gseh, dass das e Huuffe Problem generiert? Z. B. Laser, oder Velo ohni Liecht, oder jedi Mängi Gfätterlizüüg im Auto u so? Derfür när gränne, we öppis ?passiert. - Warum cha me behoupte, me liebi syner Ching u Grossching ganz schuderhaft fescht – u ne de ohni Wyteres e Huuffe unändlech strahlende Atom-Grümpu uf dere Wäut zrüggla? - Warum regt me sech über Chinderarbeit i angerne Länder uuf u gestattet hie, dass Ching i der Wärbig für di blödschte Sache ygsetzt wärde? - Warum schafft mes nid, Wärbig für Kredite z verbiete? - Warum wott me üs geng no nid vor Wärbeaarüef schütze (oder, excusez, het da vilech glych öpper Fröid dranne?). Gäng nid nume um e Duurbrönner Chrankekasse, sondern nöischterdings o no um di soziale Institutione. Warum nid meh zämeschaffe, weder die eigete Pfründ z pflege? - Warum mues me sech mittlerwyle fasch rächtfertige, we me nid aues, wo me chönnt u wo müglech isch, wott? - Warum isch z. B. i Diskussione Verzicht praktisch kes Thema? - Warum isch Auter hartnäckig immer no praktisch nume ne Choschtefaktor? - Warum hei mer eini vo de höchschte Suizidrate? - Warum mues me scho bevor es Fescht stattgfunde het, d Artikle für ds Nächschte im Lade ufsteue? - Warum wett me eewig läbe? - Warum füue sech d Lütt am ne Büffet d Täuer randvou u ässe nume d Heufti? - Warum mues es jedes Jahr Wachstum gä? - Warum gits nid meh Jungi i de Parlamänt, wo d Autherre-Clübli chly ufmische? Guet, hätt aus Jung o ke Luscht gha druf... - Warum weiss niemer, we me irgendwo nachefragt, wo üsi Date aui häregöh? - Warum hört d Demokratie bim Handu uuf? I säge nume Digitalisierig. - Warum isch es müglech, dass öpper us em Niveau ungerschti Schublade Stammtisch i höchschti Ämter chunnt?

U so chönnt me no nes Wyli wyterfahre... Ah, no öppis: Warum heisse «Mon chéri» Mon chéri u nid «Ma Chérie» he, Manne?! Z ersch de Froue schänke u när säuber främsle?

Dir kennet myni Schwechi beträffend wüsseschaftlechi Erkenntnis. Auso itz: «Affen erkennen einander am Hinterteil». Genau, han i dänkt, das bringts uf e Punkt. We d ke Füdle gsehsch, weisch o nid, wär de vor der hesch. De verschwümmt aues. U we de kener Konture gsehsch, entsteit äbe: Po-Pulismus! Nachdäm mer das o gklärt hätte, itz aber: Bi aune meh oder weniger affige Tatsache: Es guets Nöis Jahr, blybet gsung u trotz auem fröhlech.

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt